Azərbaycan və Qırğızıstan arasında iqtisadi əlaqələrin genişləndirilməsi son illər prioritet istiqamətlərdən birinə çevrilib. Prezident İlham Əliyevin Qırğızıstana səfəri zamanı ticarət, investisiya, nəqliyyat-logistika və sənaye sahələrində əməkdaşlığın genişləndirilməsi ilə bağlı müzakirələr aparılıb.
Bu barədə politoloq Zeynal Əmrəliyev 1xeber.media-ya açıqlama verib.
O qeyd edib ki, Azərbaycan ilə Qırğızıstan arasında münasibətlərin inkişafı əsasən iki istiqamətdə gedir:
“Birinci istiqamət dövlətlər arasında ikitərəfli əlaqələrin inkişafıdır. İkinci istiqamət isə Türk Dövlətləri Təşkilatı çərçivəsində əməkdaşlığın genişləndirilməsidir. Ölkələrimiz arasında mədəni və sosial münasibətlərin uzun tarixi mövcuddur. Azərbaycan və qırğız mədəniyyətləri ortaq türk mədəniyyətinin ayrılmaz tərkib hissəsi kimi hər zaman bir-birinə yaxın olub. İstər "Dədə Qorqud", istərsə də "Manas" dastanlarında ortaq tarixi köklər və ortaq dəyərlər əks olunur. Qırğız xalqının milli eposu olan "Manas" dastanı ilə Azərbaycan xalqının "Dədə Qorqud" dastanı arasında oxşar motivlər mövcuddur. Hər iki əsər ümumtürk mədəni irsinin mühüm nümunələri kimi qiymətləndirilə bilər. Siyasi-diplomatik münasibətlər də yüksək səviyyədə inkişaf edib. Azərbaycan torpaqları işğal altında olduğu dövrdə Qırğızıstan Azərbaycanın ərazi bütövlüyünü dəstəkləyib və bu məsələdə siyasi-diplomatik müstəvidə daim Azərbaycanın yanında olub”.
O deyib ki, Azərbaycan bu dəstəyi bütün Türk dünyasından görüb:
“Azərbaycan da öz növbəsində Türk dünyasının fəal üzvü kimi hər zaman Qırğızıstanın suverenliyinə və ərazi bütövlüyünə hörmətlə yanaşıb. Bu qarşılıqlı mövqe iki ölkə arasında münasibətlərin inkişafında mühüm rol oynayıb.
Son illərdə sosial-iqtisadi əlaqələr də əhəmiyyətli dərəcədə genişlənib. Bakı və Bişkek arasında sıx təmaslar davam edir. Hər iki ölkənin prezidentləri İlham Əliyev və Sadır Japarov arasında qarşılıqlı etimada əsaslanan yüksək səviyyəli münasibətlər formalaşıb. Dövlət başçılarının bir-birini ölkələrinin ali dövlət ordenləri ilə təltif etməsi də Azərbaycan-Qırğızıstan strateji tərəfdaşlığının və dostluq münasibətlərinin bariz göstəricisidir”.
Aysel Timur
