1xeber.media xəbər verir ki, Rusiya Beynəlxalq Əlaqələr Şurasının (RSMD) prezidenti Dmitri Trenin Türk Dövlətləri Təşkilatının (TDT) strateji yanaşmalarından biri hesab olunan "Türk dünyası" konsepsiyasının Rusiyaya da aid edildiyini bildirib.
O, Lenta.ru-ya müsahibəsində qeyd edib ki, Türkiyə hazırda NATO üzvü olan ölkələr arasında xarici siyasətdə müəyyən dərəcədə müstəqil kurs yürüdə bilən yeganə dövlətdir. Treninə görə, Ankara ilə münasibətlər Moskva üçün xüsusilə Cənubi Qafqaz və Yaxın Şərq baxımından mühüm əhəmiyyət daşıyır.
Ekspert bildirib ki, "Türk dünyası" konsepsiyası MDB ölkələrinin ərazilərini, eləcə də Rusiyanın müəyyən bölgələrini də əhatə edir. Onun fikrincə, Türkiyə ilə qarşılıqlı anlaşma olmadan Rusiyanın cənub sərhədləri boyunca təhlükəsizliyi təmin etməsi çətin ola bilər.
Bundan əvvəl türkiyəli ekspert, London Enerji Klubunun təsisçisi və Qlobal Resurs Tərəfdaşlığının sədri Mehmet Öğütçü Lenta.ru-ya açıqlamasında Türk Dövlətləri Təşkilatına üzv ölkələr arasında hərbi əməkdaşlığın böyük perspektiv vəd etmədiyini bildirmişdi. Bununla yanaşı, o, təşkilata daxil olan Türkiyə, Azərbaycan, Qazaxıstan, Qırğızıstan və Özbəkistan arasında mədəni və dil birliyinin güclü olduğunu vurğulamışdı.
Qeyd edək ki, bu materialda yer alan fikirlər ekspertlərin şəxsi qiymətləndirmələridir və rəsmi mövqeni əks etdirmir.
