Qəbul imtahanlarında qanunsuz texniki vasitələrdən istifadə halları ilə bağlı təqsirləndirilən təhsil eksperti Kamran Əsədov və tarix müəllimi Gündüz Abbasovun cinayət işi üzrə növbəti məhkəmə prosesi keçirilib.
1xeber.media Qafqazinfo-ya istinadla xəbər verir ki, Gəncə Şəhər Məhkəməsində hakim Elçin Məmmədovun sədrliyi ilə keçirilən proses şahidlərin dindirilməsi ilə başlayıb.
Daha əvvəl məhkəməyə çağırılsa da, iştirak etməyən şahidlər yenidən prosesə dəvət olunublar. Zərərçəkən Ramin Abdullayevin nümayəndəsi məhkəmədən ona dəymiş ziyanın ödənilməsini, həmçinin iş üzrə digər şəxslərin də prosesə çağırılmasını xahiş edib. Hakim vəsatətə növbəti mərhələdə baxılacağını bildirib.
Şahid qismində ifadə verən Şəbnəm Heydərova təqsirləndirilən Gündüz Abbasovu tanıdığını, onun bacısının həyat yoldaşı olduğunu deyib. O bildirib ki, Gündüz Abbasovu abituriyentlərə texniki vasitələrin verilməsinin qanun pozuntusu olduğu barədə əvvəlcədən xəbərdar edib.
Hakim isə şahidin ibtidai istintaqda verdiyi ifadəni xatırladaraq, Gündüz Abbasovun vaxtilə Şəmkirdə fəaliyyət göstərən kursda iki dəfə olduğunu, sonuncu səfəri zamanı isə hüquq-mühafizə orqanlarının əməliyyat keçirdiyini qeyd edib.
Digər şahid Gültac Mehdiyeva məhkəmədə qəbul imtahanları zamanı Gündüz Abbasovun kursunda olmadığını bildirib. Lakin zərərçəkən tərəf onun imtahan günü kursda olduğunu iddia edib.
Dövlət ittihamçısı isə Gültac Mehdiyevanın ibtidai istintaqda fərqli ifadə verdiyini xatırladıb. Bildirilib ki, o, xüsusi texniki vasitələr quraşdırılmış abituriyentlərə kömək etdiyini və onların suallarını cavablandırdığını ifadəsində etiraf edib.
Məhkəmədə ifadə verən digər şahid Xəqani Mehdiyevdən kimya fənni üzrə suallarla bağlı izahat alınıb. Daha sonra onun ibtidai istintaqa verdiyi ifadə elan olunub. Həmin ifadədə Xəqani Mehdiyevin tanımadığı təxminən dörd abituriyentə texniki vasitələrin köməyi ilə yardım edəcəyini bildirdiyi qeyd olunub.
Prosesdə sonuncu şahid kimi dindirilən Ruslan Çobanovdan hakim 125 min manatın 77 min manatının hansı səbəbdən Gündüz Abbasova verildiyini soruşub. Ruslan Çobanov qalan vəsaitin isə Anar adlı şəxslə öz aralarında bölüşdürüldüyünü etiraf edib.
Sonra zərərçəkən tərəf məhkəmədə ifadə verən müəllimlərin əməllərinə hüquqi qiymət verilməsini və onlar barəsində Elm və Təhsil Nazirliyinə təqdimat göndərilməsini istəyib.
Növbəti məhkəmə prosesi avqustun 13-ü saat 16:00-a təyin edilib.
