ABŞ-ın himayəsi altında yaradılan Sülh Şurası Qəzza zolağında hərbi bazanın tikintisi ilə bağlı ilk müqaviləni imzalayıb. Bu barədə The Guardian məlumat yayıb.
1xeber.media xəbər verir ki, layihənin ilk mərhələsində bazada 150 mərakeşli hərbçinin yerləşdirilməsi nəzərdə tutulur. Gələcəkdə isə obyekt beynəlxalq qüvvələrin tərkibində 5 minə qədər hərbçini qəbul edə biləcək. Tikinti müqaviləsi Amerikanın Arkel International şirkətinə verilib.
Nəşrin həmsöhbəti olan analitiklər bildiriblər ki, Qəzzada belə bir bazanın yaradılması "sülhməramlı missiya" deyil, beynəlxalq qüvvələr adı altında anklav üzərində hərbi nəzarətin möhkəmləndirilməsinə xidmət edir.
Tənqidçilərin fikrincə, Qəzzanın bərpası ilə məşğul olması nəzərdə tutulan Sülh Şurası əslində ABŞ-ın hərbi təsir imkanlarını genişləndirən alətə çevrilir.
Qeyd edək ki, bundan əvvəl Sülh Şurası Qəzza zolağında münaqişənin başa çatdırılması ilə bağlı geniş plan təqdim etmişdi. Sənəddə fələstinli silahlı qrupların mərhələli şəkildə tərksilah edilməsi, idarəçiliyin Qəzzanın İdarəetmə üzrə Milli Komitəsinə verilməsi və İsrail qoşunlarının ərazidən çıxarılması nəzərdə tutulur.
