Şahbuz Rayon İcra Hakimiyyəti Səfiquliyev Fikrətin iddiaları əsasında yayılan xəbərə münasibət bildirib.Qurumdan 1xeber.media-ya göndərilən təkzib açıqlamasını olduğu kimi təqdim edirik:
“Naxçıvan Yol Təmir Tikinti İstismar” MMC-nin Şahbuz Yol Təmir İstismar sahəsinin verdiyi məlumata əsasən 08.07.2026-cı il tarixində Səfiquliyev Fikrət İlham oğlu işə gəldikdən sonra direktor müavini ona xidməti zərurətlə əlaqədar Şahbuz-Batabat magistral avtomobil yolunun “İşgəsu” adlanan ərazisində yol kənarında torpaqla dolmuş suötürücü kanalda işləməklə bağlı tapşırıq vermiş, lakin Səfiquliyev Fikrət verilən bu tapşırığa qəti şəkildə etiraz edərək işə getməyəcəyini bildirmişdir. Direktor müavini Bəhruz Məhərrəmov ona bu tapşırığın birbaşa əmək funksiyalarına aid olduğunu və yerinə yetirilməsinin məcburi olduğunu izah etməyə çalışsa da, işçi aqressiv davranmağa başlamışdır. O, rəhbərliyin qanuni tələblərinə tabe olmamaqla kifayətlənməyib, idarə işçilərinin (şahidlərin) yanında direktor müavininin ünvanına etikadan kənar, kobud və təhqiramiz ifadələr işlətmiş və Bəhruz Məhərrəmova fiziki güc tətbiq edərək onu sinə nahiyəsindən yumruqla vurmuşdur.
Bundan sonrada intizamsızlığını davam etdirən Səfiquliyev Fikrət İlham oğlu oğlu 21.07.2026-cı il tarixində müəssisəyə gəlsə də aparıcı mühəndis Vaqif Cəfərovla mübahisə etmişdir. Vaqif Cəfərovun iş sahəsinə çıxmaq tapşırığına məhəl qoymamış, üzrlü səbəb olmadan əmək müqaviləsi və vəzifə təlimatı ilə üzərinə düşən vəzifələrdən imtina etmişdir. Səfiquliyev Fikrət İlham oğluna verilmiş tapşırıqlara baxmayaraq iş sahəsinə çıxmamış və iş yerini tərk etmişdir. Bütün bu olanlar nəzərə alınaraq “Naxçıvan Yol Təmir Tikinti İstismar” MMC-nin direktor vəzifələrini müvəqqəti icra edən Arzu Qurbanov tərəfindən işçilərin izahatları və tərtib olunmuş akt əsasında işçiyə sonuncu xəbərdarlıqla şiddətli töhmət verilmişdir.
