Veysəloğlu Şirkətlər Qrupu BMT-nin Qlobal Sazişinə üzvlüyünün ilk ili çərçivəsində özünün illik İrəliləyiş hesabatını (CoP) hazırlayaraq BMT-yə təqdim edib. Bununla da Şirkətlər Qrupu Azərbaycanın FMCG sektorunda BMT Qlobal Sazişinin prinsiplərinin icrası üzrə sözügedən hesabatı hazırlayan ilk şirkət kimi çıxış edir.
Hesabatın hazırlanması çərçivəsində Şirkətlər Qrupunun fəaliyyətində insan hüquqları, əmək münasibətləri, ətraf mühitin qorunması, şəffaf idarəetmə istiqamətləri üzrə mövcud proses və prosedurlar geniş şəkildə təhlil edilib. Eyni zamanda, həyata keçirilmiş təşəbbüslər və əldə olunan nəticələr qiymətləndirilib, ESG üzrə (ətraf mühit,sosial məsuliyyət, korporativ idarəetmə) uğur hekayələri sənədləşdirilib və qarşıdakı iki il üçün prioritet fəaliyyət istiqamətləri müəyyənləşdirilib.
CoP hesabatı Veysəloğlu Şirkətlər Qrupunun davamlı inkişaf sahəsində mövcud vəziyyətini qiymətləndirməklə yanaşı, gələcək inkişaf üçün konkret istiqamətləri də müəyyən edən diaqnostik sənəd rolunu oynayır.
Şirkətlər Qrupunundan hesabatın hazırlanmasına münasibət bildirib:
“32 il əvvəl Şirkətlər Qrupumuzun təməlini qoyarkən ESG anlayışı bugünkü qədər biznes gündəliyinin ön sıralarında olmasa da, onun əsasını təşkil edən prinsipləri fəaliyyətimizin ayrılmaz hissəsi hesab edirik. Ətraf mühitin qorunması, insanlara və cəmiyyətə məsuliyyətli yanaşma, sağlam əmək münasibətləri və dayanıqlı inkişaf bizim üçün hər zaman biznes yanaşmamızın əsasını təşkil edib.
Biznes qurmaq bizim üçün heç vaxt yalnız maliyyə göstəriciləri və sürətli böyümə demək olmayıb. Əsas məqsədimiz uzunmüddətli dəyər yaratmaq, dayanıqlı inkişaf etmək və ən yaxşı beynəlxalq təcrübələri öyrənərək fəaliyyətimizə tətbiq etmək olub. Bu gün təcrübəmizi BMT Qlobal Sazişinin üzvləri ilə bölüşmək bizim üçün mühüm göstəricidir. CoP hesabatının hazırlanması isə bu yanaşmanın yalnız bəyanat deyil, real proseslər, ölçülə bilən nəticələr və gələcək öhdəliklərlə dəstəkləndiyinin bariz nümunəsidir.”
BMT Qlobal Sazişinin Azərbaycan üzrə meneceri Samir Məmmədov isə Şirkətlər Qrupunun CoP hesabatının hazırlanması prosesini yüksək qiymətləndirərək qeyd edib:
““Veysəloğlu Şirkətlər Qrupunun BMT Qlobal Sazişinə üzvlüyünün ilk ilində CoP hesabatını hazırlaması, mənim üçün, sadəcə hesabatlılıq öhdəliyinin yerinə yetirilməsi deyil, şirkətin davamlı inkişafı biznes strategiyasının ayrılmaz hissəsi kimi qəbul etdiyini göstərən mühüm bir addımdır. Xüsusilə bu prosesin peşəkar işçi qrupunun iştirakı ilə aparılması, məlumatların sistemləşdirilməsi, mövcud proses və prosedurların təhlili, nəticələrin qiymətləndirilməsi və konkret inkişaf istiqamətlərinin müəyyənləşdirilməsi təqdirəlayiqdir.
Bu təşəbbüsün əhəmiyyətini xüsusilə pərakəndə və istehlak bazarında aparıcı mövqeyə malik olan Veysəloğlu Şirkətlər Qrupu kimi böyük bir biznes ekosisteminin timsalında qeyd etmək istərdim. Şirkətlər Qrupunun bu sahədə atdığı addımlar yalnız öz fəaliyyəti ilə məhdudlaşmır; dayanıqlılıq prinsiplərinin qrup daxilində fəaliyyət göstərən şirkətlərə və perspektivdə dəyər zəncirinə yayılması Azərbaycanda korporativ dayanıqlılıq mədəniyyətinin formalaşması baxımından daha geniş təsir yaradacaq. Ümid edirəm ki, bu yanaşma gələcəkdə qrup şirkətlərinin BMT Qlobal Sazişinin fəaliyyətində daha da yaxından iştirakına və davamlılıq üzrə birgə təşəbbüslərin genişlənməsinə də zəmin yaradacaq.
Korporativ dayanıqlılığın Azərbaycanın milli inkişaf prioritetləri, yaşıl iqtisadiyyata keçid, resurslardan səmərəli istifadə, layiqli əmək, inklüziv inkişaf və iqlim məqsədləri ilə uzlaşdırılması isə bu istiqamətdə görülən işlərin həm biznes, həm də ölkə üçün strateji əhəmiyyətini daha da artırır.”
Qeyd edək ki, Veysəloğlu Şirkətlər Qrupunun 2025-ci ildə BMT Qlobal Sazişinə qoşulması və ilk CoP hesabatını təqdim etməsi şirkətin ESG prinsiplərini biznes fəaliyyətinin ayrılmaz hissəsi kimi qəbul etdiyini nümayiş etdirir.
Şirkətlər Qrupu hesab edir ki, müasir biznes mühitində şirkətin fəaliyyətinin qiymətləndirilməsi yalnız maliyyə göstəriciləri ilə məhdudlaşmır. Qeyri-maliyyə göstəriciləri, sosial və ekoloji təsir, korporativ idarəetmənin keyfiyyəti və şirkətin maraqlı tərəflərlə münasibətləri investorlar, maliyyə institutları, tərəfdaşlar, əməkdaşlar və digər tərəfdaşlar üçün getdikcə daha böyük əhəmiyyət daşıyır.
Bu baxımdan qeyri-maliyyə hesabatlılığı şirkətin maliyyə nəticələrini tamamlayan mühüm strateji alətə çevrilir. Şəffaflıq, sosial təsirin ölçülməsi və davamlı inkişaf üzrə öhdəliklərin ictimaiyyətə açıqlanması şirkətin etimad, imic və reputasiyasının formalaşmasında mühüm rol oynayır.
