Ukrayna Rusiyanın bir sıra bölgələrinə yüzlərlə pilotsuz uçuş aparatı ilə genişmiqyaslı hücum həyata keçirib. Hücumların Ukrayna sərhədindən yüzlərlə kilometr uzaqda yerləşən əraziləri də əhatə etdiyi bildirilir.
1xeber.media xəbər verir ki, son günlər Ukraynanın Rusiyanın dərinliklərində yerləşən hərbi, sənaye və logistika obyektlərinə zərbələri intensivləşib. Avqustun 16-da Rusiya ərazisinə 800-dən çox dronla həyata keçirilən hücum ilin ən böyük hava hücumlarından biri kimi qiymətləndirilib.
Hücumların əsas istiqamətlərindən biri Moskva və Moskva vilayəti olub. Rusiya rəsmiləri yüzlərlə dronun hava hücumundan müdafiə sistemləri tərəfindən vurulduğunu açıqlayıb. Moskva yaxınlığındakı “Wildberries” logistika kompleksində də yanğın baş verdiyi bildirilib.
Ukraynanın zərbələri Rusiyanın daha uzaq bölgələrinə də çatır. Daha əvvəl Tatarıstanın Nijnekamsk şəhərində yerləşən neft emalı müəssisəsi Ukrayna dronlarının hücumuna məruz qalıb. Şəhərin Ukrayna sərhədindən təxminən 1 200 kilometr məsafədə yerləşdiyi bildirilir.
Ukrayna tərəfi uzaqmənzilli dronlardan istifadə etməklə Rusiyanın enerji, hərbi istehsal və logistika infrastrukturuna təzyiq göstərməyə çalışır. Bu hücumlar cəbhə xəttindən çox uzaqda yerləşən obyektlərin də müharibənin hədəfinə çevrildiyini göstərir.
Moskva isə Ukraynanın bu hücumlarını pisləyir və hava hücumundan müdafiə sistemlərinin Rusiyanın müxtəlif regionlarında fəaliyyət göstərdiyini bildirir. Hücumların nəticələri ilə bağlı tərəflərin açıqlamaları arasında fərqlər qalır.
