1xeber.media xəbər verir ki, Avropa İttifaqı Ukraynaya maliyyə yardımının göstərilməsi ilə bağlı yanaşmasını yenidən nəzərdən keçirə bilər.
Bu barədə Ukrayna Prezidentinin keçmiş mətbuat katibi Yuliya Mendel bildirib. Onun sözlərinə görə, Kiyevin əlavə maliyyə tələbindən sonra Avropa ölkələri Ukraynaya ayrılan vəsaitin necə maliyyələşdirilməli olduğunu müzakirə edəcək.
“Avropa indi Ukraynanı necə maliyyələşdirdiyini nəzərdən keçirəcək. Çox səxavətli yanaşma gözləmək lazım deyil”, - Mendel sosial şəbəkədə yazıb.
Bundan əvvəl “The New York Times” Ukrayna Prezidenti Volodimir Zelenskinin müdafiə büdcəsində gözləniləndən böyük kəsir yarandığı üçün Kiyevə əlavə 27 milyard dollar ayrılmasını istədiyini yazıb. Nəşrin danışdığı iki avropalı rəsmiyə görə, bəzi Avropa liderləri qapalı görüşlərdə ayrılan vəsaitlərin nə dərəcədə səmərəli xərcləndiyini sual edirlər.
Bununla belə, Aİ-nin 2026-cı il üçün Ukraynaya maliyyə və müdafiə dəstəyini davam etdirdiyi bildirilir. Avropa Komissiyasının məlumatına görə, bu il Ukraynaya 45 milyard avroyadək yardım nəzərdə tutulub.
