Azərbaycan dövlətinin başçısı: TDT qlobal arenada öz strateji sözünü deməyə qadir güc mərkəzi olmalıdır.
Bunu Azərbaycan Respublikasının Prezidenti İlham Əliyev sentyabrın 17-də Türk Dövlətləri Təşkilatının (TDT) Baş katibi Kubanıçbek Ömüralıyevi, Türkiyə Respublikasının Milli Təhlükəsizlik Şurasının baş katibi Okay Memişi, Özbəkistan Respublikasının Prezidenti yanında Təhlükəsizlik Şurasının katibi Viktor Mahmudovu, Qırğız Respublikası Təhlükəsizlik Şurasının katibi Adilet Orozbekovu, Qazaxıstan Respublikasının Təhlükəsizlik Şurası sədrinin müavini Aida Balayevanı, Şimali Kipr Türk Respublikası Baş nazirinin müşaviri Mehmet Ağanı qəbulu zamanı bildirib.
Bakıda keçirilən görüş zamanı Prezident İlham Əliyev TDT-ye üzv ölkələrin malik olduğu ümumi coğrafi ərazinin, böyük təbii resursların və iqtisadi imkanların birlikdə nəhəng bir potensial təşkil etdiyini diqqətə çatdırıb.
Təşkilata üzv ölkələrin liderlərinin ümumi məramının qlobal arenada birliyin mövqeyini kəskin şəkildə möhkəmləndirmək olduğunu deyən dövlət başçısı, TDT-nin qlobal geosiyasi məsələlərdə, transmilli layihələrin icrasında və böyük beynəlxalq müstəvilərdə daha aktiv, daha böyük aparıcı rol oynaması üçün birgə diplomatik və siyasi səylərin artırılmasının zəruriliyini ifadə edib.
