Sentyabrın 23-də Lənkəran Şəhər İcra Hakimiyyətinin (ŞİH) başçısı Taleh Qaraşov növbəti səyyar görüş-qəbulunu Şağlakücə kənd inzibati ərazi dairəsinə daxil olan Şağlakücə və Ballabur kəndlərinin sakinləri ilə keçirib. Səyyar qəbulda icra başçısı ilə birlikdə icra hakimiyyəti aparatının məsul şəxsləri, rayonun hüquq-mühafizə orqanlarının, əlaqədar təşkilatların və xidmət sahələrinin rəhbər işçiləri də iştirak ediblər.
1xeber.media xəbər verir ki, səyyar görüş-qəbulun 27 Sentyabr- Anım Günü ərəfəsində keçirildiyini bildirən Taleh Qaraşov çıxışında 44 günlük Vətən müharibəsində canlarından keçmiş şəhidlərimizin əziz xatirəsini ehtiramla yad etdi və onların göstərdiyi şücaətin heç vaxt unudulmayacağını vurğuladı.
ŞİH başçısı çıxışında regionların sosial-iqtisadi inkişafı çərçivəsində kənd təsərrüfatının inkişafına dair Dövlət Proqramının icrası vəziyyətinə də toxunub. O qeyd edib ki, dövlət proqramı çərçivəsində Lənkəran rayonunda, o cümlədən Şağlakücə və Ballabur kəndlərində aqrar sektorun dirçəldilməsi, yerli istehsalın artırılması və fermerlərə dövlət dəstəyinin gücləndirilməsi istiqamətində mühüm addımlar atılır. Müasir suvarma sistemlərinin qurulması, subsidiyaların verilməsi və intensiv təsərrüfat metodlarının tətbiqi kənd zəhmətkeşlərinin rifahını daha da yüksəldəcək.
İcra başçısı həmçinin dövlət idarəçiliyində müasir texnologiyaların tətbiqinin önəmini vurğulayaraq, "Rəqəmsal İcra Hakimiyyəti" layihəsi və bu istiqamətdə qəbul edilmiş Yol Xəritəsinin icrasından danışıb. Qeyd olunub ki, ölkədə geniş vüsət alan rəqəmsallaşma prosesi vətəndaşlarla dövlət qurumları arasında münasibətlərin tam şəffaf və çevik şəkildə qurulmasına xidmət edir. Sakinlər artıq bir çox müraciətlərini və təkliflərini elektron platformalar vasitəsilə birbaşa ŞİH-ə ünvanlaya bilirlər ki, bu da bürokratiyanın aradan qaldırılmasına və vətəndaş məmnunluğunun ən yüksək səviyyədə təmin edilməsinə zəmin yaradır.
Daha sonra icra başçısı ötən görüş-qəbulda qaldırılan məsələlərin icra vəziyyəti barədə yerli sakinlərə məlumat verib. Bildirilib ki, yerli icra hakimiyyətinin səlahiyyətlərinə aid olan və obyektiv qaldırılan bütün məsələlər həllini tapıb, şəhər İcra hakimiyyətinin səlahiyyətlərinə aid olmayan məsələlər barədə isə aidiyyəti qurumlara rəsmi müraciətlər ünvanlanıb və bu barədə vətəndaşlara məlumat verilib. İcra başçısı cənab Prezident İlham Əliyevin göstərişlərinə uyğun olaraq vətəndaşların müraciətlərinə daha həssas yanaşıldığını, vətəndaş məmnunluğunun təmin edilməsi üçün bütün mümkün imkanlardan istifadə olunduğunu vurğulayıb.
Şağlakücə və Ballabur kəndlərinin sakinləri səyyar görüş-qəbulda qaldırdıqları məsələlərə səmimi yanaşma gördüklərinə, həmçinin kənd təsərrüfatının inkişafı və müasir rəqəmsal xidmətlərin tətbiqi ilə bağlı görülən işlərə görə icra başçısına təşəkkür ediblər.
Yerli insanlar yeni iqtisadi islahatların nəticələrini qalib xalqın nümayəndələri kimi gündəlik həyatlarında da hiss etdiklərini və buna görə cənab Prezident İlham Əliyevə və Birinci vitse-prezident Mehriban xanım Əliyevaya minnətdarlıqlarını bildiriblər.
