Eyni süd, eyni yumurta, eyni un... Amma market dəyişən kimi qiymət də dəyişir. Bəzən cəmi bir neçə qəpik fərq olur, bəzən isə eyni məhsulu almaq üçün 1-2 manat artıq pul ödəmək lazım gəlir.
1xeber.media xəbər verir ki ,yeni sabah gündəlik süfrədə ən çox istifadə olunan 5 əsas ərzaq məhsulunun Bakıdakı müxtəlif onlayn satış qiymətlərini müqayisə edib. Araşdırmaya “Araz”, “Bazarstore”, “Bravo”, “Tamstore” və “Wolt Market” daxil edilib.
Məqsəd eyni məhsulun müxtəlif satış platformalarında istehlakçıya neçəyə təklif edildiyini göstərmək və qiymət fərqinin haradan yarandığını araşdırmaqdır.
Süd
İlk olaraq gündəlik alınan əsas məhsullardan biri olan südə baxdıq.
“Araz”ın onlayn mağazasında 1 litrlik Milla südün 1,5 faizli növü hazırda 2,29 manata satılır. Eyni məhsulun 2,5 faizli növü də endirimlə 2,29 manat göstərilir. “Bazarstore”da isə Milla südün 1,5 faizli 1 litrlik qablaşdırması 2,69 manatdır. 2,5 faizli növ 2,79 manat, 3,2 faizli növ isə 2,45 manatlıq endirimli qiymətlə təqdim olunur.
Bu nümunədə yalnız marketlərin öz onlayn səhifələrindəki qiymətlər arasında belə 40 qəpiyə qədər fərq yaranır.
“Wolt Market”də isə məhsulun qiyməti daha da dəyişir. Platformada məsələn, 1 litrlik bəzi süd məhsullarının qiyməti 6 manatdan yuxarı göstərilir. Lakin burada məhsulun markası və növü fərqli olduğundan onu birbaşa Milla südü ilə müqayisə etmək düzgün olmaz.
Yumurta
İkinci məhsul yumurtadır.
“Araz”ın onlayn mağazasında 10 ədəd TAC Giləzi ağ yumurta 2,40 manatdır. Eyni kateqoriyada digər yumurtaların qiyməti 2,60-2,90 manat arasında dəyişir.
“Bazarstore”da isə 10 ədəd Giləzi ağ yumurta 2,30 manat, Pirsaat ağ yumurta 2,70 manat, “Çil-Çil” ağ yumurta 2,50 manat, bəzi kənd və üzvi yumurtalar isə 3,30-3,99 manat arasında göstərilir.
“Bravo”nun Wolt üzərindən satışında 10 ədəd ağ N1 yumurta 2,95 manat, Milvana ağ yumurta 2,90 manat, kənd yumurtası isə 3,40 manatdır.
Burada qiymət fərqinin bir səbəbi məhsulun eyni kateqoriyaya aid olsa da, istehsalçı, yumurtanın ölçüsü və “kənd”, “broyler” kimi xüsusiyyətlərinin fərqli olmasıdır.
Un
Un da mətbəxdə ən çox istifadə olunan məhsullardandır.
“Bravo”nun Wolt üzərindən satışında 1 kiloqram Tsar ununun qiyməti 1,85 manat, Makfa ununun qiyməti isə bəzi filiallarda 1,59-1,60 manat göstərilir. Femilea ununun 1 kiloqramı 1,19 manatlıq endirimli qiymətlə də təqdim olunur.
“Wolt Market”də isə Tsar ununun 1 kiloqramı 1,99 manat, Makfa ununun 1 kiloqramlıq qablaşdırması 1,69 manatdır.
Düyü
Düyüdə qiymət fərqi daha genişdir. Bunun əsas səbəblərindən biri məhsulların markasının və düyünün növünün dəyişməsidir.
“Araz”ın Wolt səhifəsində 1 kiloqram paketdə Sultan Basmati düyüsü 4,50 manat, çəki ilə satılan yumru düyü isə 1 kiloqram üçün 2,50 manat göstərilir. Richmond yumru düyünün 800 qramlıq qablaşdırması 2,85 manatdır.
“Tamstore”un Wolt səhifəsində isə 800 qramlıq Günaydın yumru düyü 1,79 manatlıq endirimli qiymətlə, Richmond uzun düyü 800 qram üçün 2,95 manat, Sultan Basmati düyüsü 1 kiloqram üçün 5,95 manat göstərilir.
Yəni düyüdə sadəcə “1 kiloqram düyü” deməklə qiymət müqayisəsi aparmaq düzgün deyil. Yumru, uzun, basmati, yerli və idxal məhsullarının qiymətləri ciddi şəkildə fərqlənir.
Şəkər
Beşinci məhsul şəkərdir.
“Araz”ın Wolt üzərindən satış səhifəsində İmişli şəkər tozunun 1 kiloqramı təxminən 1,49 manat, digər 1 kiloqramlıq şəkər məhsulu isə 1,59 manat göstərilir.
“Bravo”nun Wolt səhifəsində isə 800 qramlıq Richmond şəkər tozu 1,85 manat, 700 qramlıq Azərşəkər toz şəkər 1,75 manatdır.
“Wolt Market”də isə şəkər və qənd məhsullarında qiymətlər qablaşdırmaya və məhsulun növünə görə dəyişir. Məsələn, 350 qramlıq Azərşəkər sarma qənd 2,15 manatdır.
Bəs eyni məhsul niyə fərqli qiymətə satılır?
Araşdırma göstərir ki, qiymət fərqinin yalnız bir səbəbi yoxdur.
Birinci səbəb endirimlərdir. Marketlər müəyyən məhsulları qısa müddətə daha aşağı qiymətə sata bilər. Məsələn, “Araz”ın 24 sentyabr-7 oktyabr tarixləri üçün qüvvədə olan endirim jurnalında 1000-dən çox məhsula endirim elan edilib.
İkinci səbəb satış platformasıdır. Marketin öz internet səhifəsində olan qiymətlə həmin marketin Wolt üzərindən satdığı qiymət eyni olmur.
Üçüncü səbəb çatdırılma və platforma xərcləridir. Wolt üzərindən sifariş zamanı məhsulun qiymətindən əlavə çatdırılma haqqı da tətbiq olunur. Buna görə yalnız məhsulun qiymətinə baxmaqla “ən ucuz market” nəticəsinə gəlmək düzgün deyil. Sifarişin yekun məbləğinə baxmaq lazımdır.
Bir məhsulda 30-40 qəpiklik fərq ilk baxışdan böyük görünməyə bilər. Lakin ailə hər həftə eyni məhsulları alırsa, bu fərq ayın sonunda nəzərəçarpacaq məbləğə çevrilir. Bu səbəbdən gündəlik alış-verişdə yalnız məhsulun qiymətinə deyil, onun hansı platformada, hansı endirimlə və hansı əlavə xərc hesabına satıldığına da baxmaq vacibdir.
Qeyd edək ki, bu araşdırmada qiymətlər 24 sentyabr 2026-cı il tarixində açıq onlayn satış səhifələrində görünən məlumatlar əsasında götürülüb.
