1xeber.media xəbər verir ki, "France Info"nun məlumatına görə, Fransanın "Mediapart" nəşri "Milli Birlik" (Rassemblement National) partiyasının lideri Jordan Bardellanın 2013-2015-ci illər arasında şəxsi söhbətlərində antisemit və sui-qəsd nəzəriyyələri ilə dolu fikirlər səsləndirdiyini iddia edən bir araşdırma dərc edib.
"Mediapart"ın məlumatına görə, təxminən 18 yaşı olarkən göndərdiyi şəxsi mesajlarda Bardella, digər məsələlərlə yanaşı, "bütün bankların yəhudilərə məxsus olduğunu" iddia edib və İsrail tərəfindən idarə olunan "Yeni Dünya Nizamı"ndan bəhs edib. Nəşr müstəqil şəkildə təsdiqləndiyi bildirilən onlarla yazılı mesajı, eləcə də şahid ifadələrini əsas gətirir.
Bardella iddiaları qətiyyətlə rədd edərək onları "açıq-aşkar uydurma" və "qarayaxma kampaniyası" adlandırıb. O bildirib ki, vəkili artıq "Mediapart"a qarşı şərəf və ləyaqətin təhqir edilməsi ilə bağlı iddia qaldırıb. Siyasətçi sosial şəbəkələrdə bəyan edib: "Mənə aid edilən bu absurd və antisemit bəyanatları qətiyyətlə rədd edirəm".
"Milli Birlik" partiyasının lideri Marin Le Pen Bardellanın müdafiəsinə qalxıb. O, "Mediapart"ın məqaləsini oxumadığını, lakin bunun "saxta" və "manipulyasiya" olduğunu bildirib. O, jurnalistlərə deyib: "Bu, o qədər ağlasığmaz görünür ki, yalnız saxtakarlıq və ya çirkin bir oyun ola bilər – hansı ki, "Mediapart" belə işlərdə mahirdir".
"Mediapart" isə öz hesabatının doğruluğunu müdafiə edir. Araşdırmanın müəlliflərindən biri bildirib ki, həmin dövrdə Bardella antisemit ideologiya ilə səciyyələnən dairələrdə olub və yazılı sübutlar həqiqidir.
Daha əvvəl Fransanın sağçı "Milli Birlik" partiyasının lideri Jordan Bardellaya yarmarkada olduğu zaman sarımsaq başı atılmışdı. Yayımlanan görüntülərdə sarımsaq başlarının ona dəydiyi görünür; təhlükəsizlik əməkdaşları dərhal onu izdihamdan qoruyub və sonra mühafizə məqsədilə bir neçə çətir açıblar.
Le Pen partiyanın parlamentdəki fraksiyasına rəhbərlik edir. O, 2027-ci ildə keçiriləcək Fransa prezident seçkilərində partiyanı təmsil etmək niyyətindədir.
