Hacıqabul Rayon İcra Hakimiyyəti Hacıqabul şəhərində yolların əsaslı təmiri işləri ilə bağlı elan etdiyi tenderə yekun vurub.
1xeber.media xəbər verir ki, tenderin qalibi “Mühəndis Yol Təmir Tikinti” MMC seçilib. Yolların əsaslı təmiri işlərinin görülməsi üçün şirkətlə 505 480,72 manat dəyərində satınalma müqaviləsi bağlanacaq.
İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, “Mühəndis Yol Təmir Tikinti” MMC 2004-cü ildə dövlət qeydiyyatına alınıb. Şirkətin nizamnamə kapitalı 658 020 manatdır. Hüquqi ünvanı Bakı şəhəri, Nizami rayonu, Əlağa Kürçaylı küçəsi, ev 7, mənzil 45-də yerləşir. Qanuni təmsilçisi Səfərov Rafiq İbrahim oğludur.
Açıq mənbələrdə şirkət və onun qanuni təmsilçisi barədə geniş məlumat yoxdur.
“Mühəndis Yol Təmir Tikinti” MMC müxtəlif dövlət qurumlarının keçirdiyi yol tikintisi və təmiri ilə bağlı satınalmalarda iştirak edib. Şirkətin adı son illərdə bir sıra iri dövlət satınalmalarında qalib kimi də hallanıb.
Bundan başqa, media resurslarında “Mühəndis Yol Təmir Tikinti” MMC-nin Quba rayonunun keçmiş icra başçısı Ziyəddin Əliyevlə əlaqəli olduğu barədə iddialar yayılıb. Bəzi media materiallarında şirkətin faktiki olaraq sabiq icra başçısına bağlı olduğu irəli sürülüb.
Hacıqabul Rayon İcra Hakimiyyəti ötən il yolların təmirinə 460 137,37 manat xərcləyib.
