1xeber.media xəbər verir ki, ABŞ və Hindistan arasında uzun müddətdir müzakirə olunan ikitərəfli ticarət sazişinin yaxın zamanda imzalanması gözlənilmir.
ABŞ Ticarət Nümayəndəsi Ceymison Qrir bildirib ki, Vaşinqton və Yeni Dehli danışıqları davam etdirir. Onun sözlərinə görə, tərəflər arasında konstruktiv müzakirələr aparılıb və saziş üzrə əsas fikir ayrılığı yaradan məsələlərin siyahısı artıq müəyyənləşdirilib.
Qrir ABŞ və Hindistanın danışıqları yekunlaşdırmaq üçün intensiv işlədiyini desə də, razılaşmanın yaxın günlərdə elan ediləcəyini düşünmədiyini bildirib. O, tərəflərin hələ də bir sıra məsələlər üzrə ortaq mövqeyə gəlməli olduğunu vurğulayıb.
Məlumata görə, ABŞ və Hindistan nümayəndələri məsələni Miluokidə keçirilən G20 ticarət nazirlərinin toplantısı çərçivəsində də müzakirə ediblər. Hindistanın ticarət naziri Piyuş Qoyalla görüşdə danışıqların əsas istiqamətləri nəzərdən keçirilib.
Ticarət razılaşmasının əsas məqsədlərindən biri iki ölkə arasında bazarlara çıxış imkanlarını genişləndirmək və qarşılıqlı ticarətdə mövcud maneələri azaltmaqdır. Danışıqların yekun nəticəsinin ABŞ və Hindistan arasında iqtisadi münasibətlərə təsir göstərəcəyi bildirilir.
