1xeber.media xəbər verir ki, Ukrayna Rusiya ilə mümkün atəşkəs üzrə Hindistan, Türkiyə, Misir və ABŞ-dan dörd ayrı təklif alıb.
Ukraynanın xarici işlər naziri Andrey Sibiha bildirib ki, Kiyev müxtəlif atəşkəs formatlarını nəzərdən keçirməyə hazırdır. Onun sözlərinə görə, ən genişmiqyaslı təklif Hindistandan gəlib. Bu təşəbbüs enerji sahəsi ilə yanaşı, Qara dənizdə atəşkəsin də tətbiqini nəzərdə tutur.
Sibiha qeyd edib ki, Ukraynanın mövqeyinə əsasən, enerji atəşkəsi bütün enerji obyektlərinə, o cümlədən liman infrastrukturuna zərbələrin dayandırılmasını əhatə etməlidir. Kiyev enerji obyektlərinə hücumların dayandırılması ilə Qara dənizdə atəşkəsin eyni vaxtda həyata keçirilməsini istəyir.
Türkiyə və Misirin təklifləri isə əsasən Qara dənizdə atəşkəsə və taxıl ixracının bərpasına yönəlib. Bu təşəbbüslərin həyata keçirilməsi halında dəniz daşımalarının təhlükəsizliyinin təmin edilməsi və Ukrayna taxılının dünya bazarlarına çıxarılması üçün şəraitin yaradılması nəzərdə tutulur.
ABŞ-ın təklifi isə enerji obyektlərinə hücumların dayandırılmasına yönəlib. Sibiha bildirib ki, bu məsələ Ukrayna Prezidenti Volodimir Zelenski ilə ABŞ Prezidenti Donald Tramp arasında görüş zamanı da müzakirə olunub. Vaşinqton Moskva və Kiyevin enerji infrastrukturuna qarşı hücumların dayandırılması barədə razılığa gəlməsini təşviq edir.
Ukraynanın xarici işlər naziri əlavə edib ki, Kiyev yalnız ayrı-ayrı sahələr üzrə deyil, daha geniş atəşkəs variantlarını da müzakirə etməyə hazırdır. Onun sözlərinə görə, təmas xətti boyunca şərtsiz atəşkəs də mümkün variantlar sırasında nəzərdən keçirilir. Hazırda isə tərəflər arasında yekun atəşkəs razılaşmasının əldə edildiyi barədə məlumat yoxdur.
