“İki il əvvəl qarşımıza sadə, amma böyük bir məqsəd qoyduq: oxucunun etibar etdiyi, xəbərin doğru və operativ ünvanına çevrilmək”.
1xeber.media xəbər verir ki, bu barədə bu gün iki yaşını qeyd edən “Ajans.az” xəbər portalının ad günü ilə bağlı məqaləsində qeyd olunub.
“Bu iki il ərzində yüzlərlə hadisəni işıqlandırdıq, minlərlə xəbəri oxucularımıza çatdırdıq. Bəzən bir xəbərin arxasında saatlarla, hətta aylarla davam edən araşdırma, bəzən saniyələrlə ölçülən operativlik, bəzən isə ən doğru məlumatı əldə etmək üçün göstərilən böyük zəhmət dayandı.
Bizim üçün hər xəbər sadəcə informasiya olmadı. Cəmiyyətin səsini eşitmək, problemləri gündəmə gətirmək, baş verənləri olduğu kimi çatdırmaq əsas prinsiplərimizdən oldu.
Bu müddətdə xəbərlərimiz gündəm yaratdı, müzakirələrə səbəb oldu, problemlərin diqqətə çatdırılmasına və onların həlli istiqamətində addımlar atılmasına töhfə verdi. Sosial platformalarda qazandığımız böyük auditoriya isə bizə göstərdi ki, doğru və operativ xəbərə olan ehtiyac hər gün daha da artır.
İki il ərzində bizi oxuyan, izləyən, xəbərlərimizi paylaşan, fikirlərini bizimlə bölüşən hər kəs bu hekayənin bir parçasıdır.
Bu gün 2 yaşımız tamam olur. Amma bizim üçün bu, sadəcə yeni yaş deyil — daha böyük hədəflərə doğru yeni başlanğıcdır.
Qarşıda daha çox xəbər, daha çox araşdırma, daha çox məsuliyyət və ən əsası, daha böyük etimad var.
Biz dəyişən medianın tempinə uyğunlaşaraq öyrənməyə, inkişaf etməyə və ən əsası, sizin xəbəriniz olmağa davam edəcəyik.
2 yaşımız mübarək!
Bu yolun hər addımında bizimlə olan hər bir oxucumuza və izləyicimizə təşəkkür edirik”, - deyə məqalədə bildirilib.
1xeber.media olaraq Ajans.az-ı ad günü münasibətilə təbrik edir, həmkarlarımıza daha böyük uğurlar arzulayırıq.
