Azərbaycan Dövlət Su Ehtiyatları Agentliyinin tabeliyində fəaliyyət göstərən Regional Su Meliorasiya QSC-də rəhbər dəyişikliyini yalnız kadr yerdəyişməsi kimi təqdim etmək məsələnin mahiyyətini tam əks etdirmir.
1xeber.media xəbər verir ki,qurumun əvvəlki rəhbərliyində sədr müavini vəzifəsini tutmuş Elçin Məmmədovun icraçı direktor təyin edilməsi, ilk növbədə, təşkilatın fəaliyyət mexanizmlərinə bələd olan idarəçilik nümayəndəsinin yeni məsuliyyət mərhələsinə keçidi kimi qiymətləndirilə bilər.
Sədr müavini vəzifəsi regional su təsərrüfatının idarə olunması, struktur bölmələri arasında koordinasiya və əməliyyat proseslərinin təşkili kimi istiqamətlərlə əlaqəli məsuliyyət daşıyır. Bu vəzifədə uğurla çalışmış şəxsin icraçı direktor təyin edilməsi ona mövcud idarəetmə sisteminin xüsusiyyətlərini, qarşıda duran vəzifələri və təkmilləşdirilməli sahələri daha yaxından qiymətləndirmək imkanı verəcək.
Elçin Məmmədovun qarşısında indi daha geniş icra məsuliyyəti dayanır. Söhbət yalnız mövcud işlərin davam etdirilməsindən deyil, suvarma sistemlərinin səmərəliliyinin artırılmasından, su itkilərinin azaldılmasından, regionlarda xidmət keyfiyyətinin yüksəldilməsindən və dövlət resurslarından daha qənaətli istifadənin təmin olunmasından gedir.
Yeni təşkilati-hüquqi status şəraitində idarəetmənin nəticəyönümlü qurulması, struktur bölmələrinin fəaliyyətinin əlaqələndirilməsi və konkret göstəricilər əsasında hesabatlılığın gücləndirilməsi xüsusi əhəmiyyət daşıyır. İcraçı direktorun fəaliyyəti də məhz bu meyarlar əsasında qiymətləndiriləcək.
Elçin Məmmədovun əvvəlki rəhbər heyətdə çalışması idarəçilikdə davamlılıq üçün zəmin yaradır. Eyni zamanda, yeni vəzifə daha yüksək məsuliyyət, daha çevik qərarvermə və daha ölçülə bilən nəticələr tələb edir.
Bu baxımdan, təyinat ətrafında səslənən müxtəlif mülahizələrdən, spekulyativ yanaşmalardan daha vacib olan məsələ yeni rəhbərin qarşıya qoyulan vəzifələri necə həyata keçirəcəyidir. Peşəkarlığın ən inandırıcı göstəricisi vəzifə adı deyil, idarəetmədə nümayiş etdirilən səriştə və əldə olunan real nəticələrdir.
Regional su təsərrüfatında əsas hədəf dəyişməzdir: su ehtiyatlarından səmərəli istifadə, fermerlərin su təminatının yaxşılaşdırılması və dövlətin bu sahəyə yönəltdiyi resursların konkret nəticələrə çevrilməsi... Elçin Məmmədovun yeni vəzifədə fəaliyyəti də bu strateji hədəflərə verdiyi töhfə ilə ölçüləcək.
