1xeber.media xəbər verir ki, ABŞ Prezidenti Donald Trampın İsrailin Baş naziri Benyamin Netanyahu ilə İrana qarşı yeni hərbi əməliyyat keçirmək məsələsində razılığa gəlmədiyi bildirilir.
CNN telekanalının ABŞ rəsmilərinə və İsrail kəşfiyyatındakı mənbələrə istinadən yaydığı məlumata görə, Netanyahu İsraildə keçiriləcək parlament seçkilərindən əvvəl İranla birgə zərbə endirmək üçün Trampı razı salmağa çalışıb. Lakin ABŞ prezidenti bu plana yaşıl işıq yandırmayıb.
Məlumata görə, Vaşinqtonun qərarına təsir edən amillərdən biri mümkün hərbi əməliyyatın İsraildəki seçkilərə mənfi təsir göstərməsi ehtimalı olub. Mənbələr hesab edirlər ki, İrana yeni zərbə seçkilərin təxirə salınmasına da səbəb ola bilərdi.
Qeyd edək ki, İsraildə parlament seçkiləri oktyabrın 27-nə planlaşdırılıb. Seçkilərin nəticələrinə əsasən, ölkənin növbəti hökuməti formalaşdırılmalıdır.
CNN-in məlumatı anonim mənbələrə əsaslanır. ABŞ və İsrail rəsmilərinin bu iddialarla bağlı rəsmi mövqeyi təqdim olunan materialda göstərilmir.
