Uşaqlar üçün yaşayış minimumu və alimentin miqdarı artırılıb. Qanunvericilikdə göstərilir ki, uşaqları saxlamaq valideynlərin həm borcu, həm də hüququdur. Ali Məcəlləsinə əsasən, hər bir uşaq ailədə yaşamaq, tərbiyə almaq, valideynlərini tanımaq, onların qayğısından yararlanmaq hüququna malikdir.
1xeber.media xəbər verir ki, vəkil Mədinə Leqayeva mövzu ilə bağlı İTV-yə danışıb.
Onun sözlərinə görə, bir çox hallarda alimenti alan tərəf düşünür ki, miqdar artırılanda məhkəmənin qanuni qüvvəsini alan qətnamə üzrə məbləğ də dərhal artır:
“Lakin bu belə deyil. Tələbkar alimentin məbləğinin artırılması üçün ilkin mediasiya təşkilatına müraciət etməli, barışıq sazişinin bağlanması mümkün olmadığı təqdirdə məhkəməyə müraciət etməlidir. Bundan sonra məhkəməyə müraciət zamanı qüvvədə olan qanunvericiliyə əsasən iddianı təmin edə bilər. Ailə münasibətlərindən irəli gələn məsələlərə ilkin mediasiya təşkilatına müraciət edilməsi məcburidir”.
Vəkil bildirib ki, alimentin məbləği işə baxılan zaman qüvvədə olan qanuna əsasə uşaqların yaşayış minimumu həddində müəyyən edilir:
“Hər ilin sonunda növbəti il üçün əhalinin əsas sosial demoqrafiq qrupları üzrə yaşayış minimumu məbləği müəyyən edilməsi üçün Milli Məclis tərəfindən qanun layihəsi hazırlanır və Prezident tərəfindən təsdiq edilir. Qanun isə yeni ilin yanvar ayının 1-dən qüvvəyə minir. 2025-ci il üçün yaşayış minimumu ölkə üzrə 285 manat, əmək qabiliyyətli əhali üçün 305 manat, pensiyaçılar üçün 232 manat və uşaqlar üçün 246 manat məbləğində müəyyən edilmişdir”.
