"Bələdiyyələrin sayının azalması elə də ciddi effektiv nəticə doğurmalı deyil. Ona görə ki, bələdiyyənin səlahiyyətini artırmaq lazımdır. Birinci bu məsələ üzərində düşünülməlidir".
Bunu 1xeber.media açıqlamasında deputat Fazil Mustafa deyib. O bildirib ki, bələdiyyələrin sayının azalması müsbət tendensiyadır:
"O baxımdan ki, əhali sayı az olan yerlərdə boşuna yeni bir strukturun yaranmasına ehtiyac qalmır. Bu bələdiyyələrin sayı azalandan sonra məsələn, Bakının rayonlarında bələdiyyələrin səlahiyyəti olacaqmı? Buna imkan yaradılacaqmı ki, yerli problemləri həll etsin. Bunun üzərində düşünülməlidir. Bələdiyyələrə gerçək yerli özünüidarəetmə statusu verilməlidir. Bu olarsa, onda hər hansı şəkildə effekti üzə çıxacaq. Bu seçkilərdən sonra daha aydın bilinəcək ki, bələdiyyə yenə cansız orqanizm kimi qalacaq, yoxsa aktiv fəaliyyət göstərən qurum olacaq. Real mənzərə bunu daha dəqiq göstərəcək".
Qeyd edək ki, yanvarın 29-u Azərbaycanda bələdiyyə seçkiləri keçiriləcək. Budəfəki seçkidə bələdiyyələrin sayı 2 dəfədən çox azaldılıb. Bələdiyyələrin sayı 1606-dan 921 vahid azaldılaraq 685-ə endirilib.
