Daxili İşlər Nazirliyinin 102 xidmətinin operatorunu təhqir edən şəxs barəsində tədbir görülüb.
1xeber.media Teleqraf-a istinadən xəbər verir ki, Ağcabədi rayon sakini, 2004-cü il təvəllüdlü Bəhruz Bayramov (ad-soyad şərti verilib – red.) Daxili İşlər Nazirliyinin “102” xidmətinə zəng edib, iş rejimini pozaraq operatorun ünvanına nalayiq ifadələr işlədib.
İş üzrə izahat verən Bəhruz ona elan olunmuş ittiham üzrə özünü təqsirli bilib. Bildirib ki, zəng edərək “102” xidmətinin iş rejimini pozub, operatorun ünvanına nalayiq ifadələr işlədib: “Bu hərəkətlərimi sərxoş olduğum üçün etmişəm. Hazırda əməlimdən peşmanam”.
Bəhruzun barəsində İnzibati Xətalar Məcəlləsinin 510 (xırda xuliqanlıq) və 535.1-ci (polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmama) maddələri ilə ittiham elan edilib.
Ağcabədi Rayon Məhkəməsinin qərarı ilə 8 gün müddətində həbs edilib.
