Həbsdə olan vəkil Adəm Məmmədovun Şirin Abasov və həyat yoldaşı Gülbadama qarşı xüsusi ittiham qaydasında verdiyi şikayətə baxılıb.
1xeber.media Teleqraf-a istinadən xəbərə görə, xüsusi ittihamçı A.Məmmədov şikayətində Şirin və Gülbadam Abbasovların sosial şəbəkələrdə müsahibə verərkən onun haqqında həqiqətə uyğun olmayan məlumatlar səsləndirirdiyini göstərib.
İttihamçı qeyd edib ki, ər-arvad Vəkillər Kollegiyasının inzibati binasının qarşısında guya onların evini satdırdığını, onlardan 30.000 manat rüşvət aldığını, Zərdabi adlı jurnalist vasitəsi ilə dələduzluq edərək əlavə olaraq 53.500 manat məbləğində pullarını ələ keçirdiyini, onlara hədə-qorxu gəldiyini, ümumilikdə 83.500 manat məbləğində pullarını alaraq qaytarmadığını bildiriblər.
Vəkil onların 147.2 (ağır və ya xüsusilə ağır cinayətdə ittiham etməklə böhtan atma) və 148-ci (təhqir) maddələri ilə cinayət məsuliyyətinə cəlb olunmalarını istəyib.
Binəqədi Rayon Məhkəməsində hakim Zamiq Bağırovun sədrliyi ilə keçirilən prosesdə xüsusi ittiham qaydasında şikayət vermiş vəkil şikayətdə yenidən düzəlişlər edilməsini əsas gətirib və şikayəti geri götürmək istədiyini bildirib.
Bununla bağlı ərizəsini məhkəməyə təqdim edib.
Abbasovlar isə xüsusi ittihamçı tərəfindən şikayətin geri götürülməsinə etiraz ediblər. Onlar xüsusi ittiham qaydasında şikayətin düzgün tərtib olunmadığını, şikayətin məhkəmə tərəfindən icraata götürülməsindən imtina olunması barədə qərar qəbul olunmasını xahiş ediblər.
Məhkəmə isə vəkilin xahişinə müsbət cavab verməyib.
Hakim şikayətin icraata qəbul olmasından imtina edilməsi barədə qərar qəbul edib.
