Azərbaycanda istehsal olunan məhsullar yerli bazara nisbətən xarici bazarlara daha aşağı qiymətə təklif olunur. Digər tərəfdən, xarici bazarın tələbələri yüksək olduğu üçün Azərbaycan bu bazarlara daha keyfiyyətli məhsullar çıxarır.
1xeber.media xəbər verir ki,mövzuya münasibət bildirən iqtisadçı ekspert Eyyub Kərimli Bakupost.az -a deyib ki, bu cür hallar bütün ölkələrdəki xarici ticarət proseslərində mövcuddur:
''Bəzən yerli məhsullar rəqabətliliyi təmin etmək üçün xarici ölkələrə daha ucuz satılır. Biz bunu həm Türkiyə, həm də digər ölkələrin məhsullarında müşahidə edirik. Çox vaxt Türkiyədə satılan tekstilin qiyməti ölkəmizdəki ilə eyni olur. Bu da xaricdəki məhsullar ilə rəqabətliliyi təmin etmək üçündür. Bu, ixrac potensialının stimullaşdırılmasına yönəlmiş siyasətdir. Sözsüz ki, xaricə satılan malların müəyyən qədər xərci də azalır. Yəni, icarə və digər xərclər malın üzərində əlavə dəyər yaratmır. Ona görə də bu amili ixrac potensialını stimullaşdırılması üçün qiymət siyasəti hesab etmək olar".
İqtisadçı ekspert Rəşad Həsənovun sözlərinə görə, ölkədə istehsal olunan məhsulun xaricə daha ucuz satılması praktiki baxımdan mümkündür:
“Çünki ixrac subsidiyasından faydalanmaqla məhsulun maya dəyərini qismən azaltmaq olur. Bizim hökumət ixrac edilən məhsula görə subsidiya verir. Başqa hökumətlər isə daxili bazarlarında təklif qıtlığını önləmək üçün tədarükçülərə subsidiya verir, vergidən, rüsumdan azad edir, satışın təşkili xərclərini kompensasiya edir və s. Başqa sözlə, ixrac edildiyi ölkələrin təşviqlərindən faydalanmaqla qiymət optimallığını təmin etmək olar. Bəzi hallarda uğursuz ixrac əməliyyatları zamanı məcburən sahibkar məhsulu daha ucuz satır. Çünki həmin ölkənin əhalisinin alıcılıq gücü və yaxud bazar şərtləri adekvat deyil. Digər bir lokal səbəb isə Azərbaycanda bazarın liberal olmaması, istehsalçıların zəif bazarlama imkanları, inhisarçılıq kimi məqamlar ola bilər”.
