Prezident Administrasiyasının keçmiş rəhbəri Ramiz Mehdiyevin Rusiyanın xüsusi xidmət orqanlarına və ya yüksək səviyyəli qurumlarından birinə yazdığı məktubu ortaya çıxıb. Bu məktub ona qarşı istintaq orqanının irəli sürdüyü ittihamları bir daha təsdiqləyir.
1xeber.media xəbər verir ki,bu sözləri Axar.az-a açıqlamasında millət vəkili Elman Nəsirov Ramiz Mehdiyevin ötən gün yayılan məktubu ilə bağlı deyib.
“Məktubdan belə anlaşılır ki, Mehdiyevin “Dövlət Şurası” yaratmaq niyyəti olub. “Dövlət Şurası” da 50 nəfər üzvdən ibarət olmalıymış.
Çox maraqlıdır ki, sözügedən “Dövlət Şurası”na hakimiyyətin hər üç qoluna - qanunvericilik, icra və məhkəmə - nəzarət hüququ verilir. Demokratik don geyindirmək üçün “Dövlət Şurası”nın üzvlərinin seçki yolu ilə, “xalq tərəfindən” seçilməsi də nəzərdə tutulub. Ramiz Mehdiyev öz rəhbərliyi ilə keçirilən seçkini istədiyi kimi manipulyasiya edəcəkdi”, - o bildirib.
Millət vəkili qeyd edib ki, çox güman ki, həmin 50 nəfərlik “Dövlət Şurası”nın tanınmış siyasətçilər, iqtisadçılar, hüquq-mühafizə orqanlarının təmsilçiləri, ziyalılar və bu kateqoriyaya aid digər şəxslərdən təşkil olunması planlaşdırılıb:
“Bu insanlar təbii ki, Ramiz Mehdiyevə yaxın və etibarlı adamlar ola bilərdi.
Yaradılan qurum isə faktiki olaraq ən üst quruma çevrilir. Yəni təsəvvür edin ki, hakimiyyətin hər üç qolu “Dövlət Şurası”nın nəzarətində olur. Bu da tamamilə diktatura deməkdir”.
Millət vəkili hesab edir ki, bu məktub artıq R.Mehdiyevə qarşı ittihamların bir daha təsdiqlənməsidir:
“Hesab edirəm ki, bu məktubdan sonra istintaq işi də sürətlənəcək”.
