5 Oktyabr - Beynəlxalq Müəllimlər Günüdür. 44 günlük Vətən müharibəsindəki şanlı zəfərin qazanılmasında Azərbaycan müəllimləri də yaxından iştirak edib. O çətin günlərdə silaha sarılaraq əsl vətənpərvərlik nümunəsi göstərən, döyüş meydanındakı qəhrəmanlıqları ilə vətənpərvərlik dərsi keçən məllimlər həm şəhid oldular, həm də qazi.
II Qarabağ müharibəsi zamanı torpaqlarımızın azadlığı uğrunda 700-dək təhsil işçisi böyük qəhrəmanlıqla döyüşüb. 44 günlük Vətən müharibəsində 20 nəfər təhsil işçisi döyüşlərdə qəhrəmanlıq və şücaət göstərərək şəhidlik zirvəsinə ucalıb.
1xeber.media Modern.az-a istinadla II Qarabağ müharibəsində qəhrəmancasına şəhid olan təhsil işçilərinin qısa dosyelərini təqdim edir:
Vəliyev Vüqar Emin oğlu 22 oktyabr 1995-ci ildə Ağdam rayonunun Rzalar kəndində anadan olub. O, Ağdam rayonu 18 nömrəli köçkün tam orta məktəbində fiziki tərbiyə müəllimi işləyib. V Vəliyev 2020-ci il oktyabrın 17-də Tərtər rayonunun Suqovuşan qəsəbəsində şəhid olub. Ölümündən sonra “Vətən uğrunda” və “Suqovuşanın azad olunmasına görə” medalları ilə təltif edilib.
Əhmədzadə Famil Ağaəhməd oğlu 23 sentyabr 1975-ci ildə Bakı şəhəri Xətai rayonunda anadan olub. O, İsmayıllı şəhərinəki 3 nömrəli məktəb-liseyin tarix müəllimi olub. 2020-ci ilin 27 sentyabrında – Vətən müharibəsi başlanan gün könüllü olaraq cəbhəyə yollanıb. Oktyabr ayının 13-dən 14-nə keçən gecə Talış-Suqovuşan istiqamətində gedən döyüşlərdə qəhrəmancasına şəhid olub. Ölümündən sonra “Vətən uğrunda” medalı, “Döyüşdə fərqlənməyə görə” medalı ilə təltif edilib.
Məmmədov Rəşad Fərəməz oğlu 4 sentyabr 1989-cu ildə Gəncə şəhərində anadan olub. O, Gəncə şəhər M.Ş.Vazeh adına 16 nömrəli tam orta məktəbin tarix müəllimi vəzifəsində çalışıb. Rəşad Məmmədov 8 noyabr 2020-ci ildə Şuşanın azadlığı uğrunda gedən döyüşlərdə qəhrəmancasına şəhid olub. Ölümündən sonra "Vətən uğrunda", “Cəsur döyüşçü” və "Şuşanın azad olunmasına görə" medalları ilə təltif olunub.
İmaməliyev Elvin Elsevər oğlu 1989-cu il mayın 9-da Ağstafa rayonunun Qırılı kəndində anadan olub. O, Ağstafa şəhəri 1 nömrəli tam orta məktəbin direktoru idi. Qarabağda qələbəmizə çox az qalmış Şuşa şəhəri yaxınlığında gedən döyüşlərdə şəhid olub. Şəhid Elvin İmaməliyev ölümündən sonra "Vətən uğrunda" və "Şuşanın azad olunmasına görə" medalları ilə təltif olunub.
Hüseynli Etiram Həsən oğlu 1977-ci il aprelin 17-də Lənkəran şəhərində anadan olub. 23 il Lənkəran şəhər S.Kazimbəyov adına 6 saylı tam orta məktəbdə gənclərin çağırışaqədərki hazırlığı fənnindən dərs deyib. Etiram Hüseynli oktyabrın 21-də Qubadlı döyüşləri zamanı şəhid olub. Ölümündən sonra “Vətən uğrunda”, "Cəbrayılın azad olunmasına görə", "Zəngilanın azad olunmasına görə" medalları ilə təltif olunub.
Ömərov Qoşqar Səxavət oğlu 9 fevral 1994-cü ildə Kürdəmir rayonunun Şilyan kəndində müəllim ailəsində anadan olub. O, Abşeron rayonu, Masazır kənd 5 saylı tam orta məktəbində riyaziyyat müəllimi kimi fəaliyyət göstərib. Qoşqar Ömərov noyabrın 4-də Şuşanın Daşaltı kəndinin ətrafında gedən döyüşlərdə şəhid olub. Ölümündən sonra "Xocavəndin azad olunmasına görə", "Füzuli azad olunmasına görə", "Şuşanınazad olunmasına görə" və "Vətən uğrunda" medalları ilə təltif olunub.
İsrafilov Vidadi Vaqif oğlu 8 iyun 1987-ci ildə Daşkəsəndə anadan olub. Daşkəsən rayonu, Gurbulaq kənd ümumi orta məktəbinin riyaziyyat müəllimi Vidadi İsrafilov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzuli, Cəbrayıl və Şuşa şəhərlərinin işğaldan azad edilməsində iştirak edib. O, 9 noyabr 2020-ci ildə Şuşa istiqamətində gedən döyüşlərdə şəhid olub. Şəhid Vidadi İsrafilov ölümündən sonra "Vətən uğrunda", "Şuşanın azad olunmasına görə" və "Cəsur döyüşçü" medalı ilə təltif edilib.
Rzayev Elxan Ariz oğlu 1994-cü il avqustun 15-də Sabirabad rayonunun Qəzli kəndində anadan olub. Elxan Rzayev noyabrın 1-də Qubadlı döyüşləri zamanı şəhid olub. Ölümündən sonra “Vətən uğrunda”, "Cəbrayılın azad olunmasına görə", "Qubadlının azad olunmasına görə" medalları ilə təltif olunub.
Nəciyev Xalid Qabil oğlu 1992-ci il iyulun 3-də Saatlı rayonunda anadan olub. 2017–2018-ci illərdə tarix və coğrafiya müəllimi olaraq çalışıb. 2017-ci ildən isə Təhsil Nazirliyinin Saatlı və Sabirabad üzrə ictimaiyyətlə əlaqələr şöbəsində çalışırdı. 2020-ci il noyabrın 5-də Laçın döyüşləri zamanı Səfiyan kəndi istiqamətində şəhid olub. Ölümündən sonra "Döyüşdə fərqlənməyə görə"” və "Laçının azad olunmasına görə" medalları ilə təltif olunub.
Quliyev Elgün Vasif oğlu 1992-ci ilin 17 sentyabr tarixində Şamaxı rayonunun Göylər kəndində anadan olub. 2020-ci ildə müəllimlərin işə qəbulu imtahanından keçərək Lerik rayonunun Sors kəndində işə qəbul olunub. Elgün Quliyev noyabrın 9-da Şuşa döyüşləri zamanı şəhid olub. “Vətən uğrunda” və "Şuşanın azad olunmasına görə" medalları ilə təltif olunub.
Rəhimov Tural Arif oğlu 1993-cü il yanvarın 1-də Cəlilabad rayonunun Söyüdlü kəndində anadan olub. O, Cəlilabad rayonunun Fərzili kənd orta məktəbində kimya-biologiya müəllimi işləyirdi. Tural Rəhimov 2020-ci il oktyabrın 22-də Qubadlı döyüşləri zamanı şəhid olub. Şəhid Tural Rəhimov ölümündən sonra “Vətən uğrunda” və "Cəbrayılın azad olunmasına görə", "Qubadlının azad olunmasına görə" medalları ilə təltif olunub.
Lətifov Rəvan Ömür oğlu 26 avqust 1991-ci ildə Oğuz rayonunun Xaçmaz kəndində anadan olub. Bir müddət Ə.Abdulhüseynov adına Sincan kənd tam orta məktəbində məktəbdənkənar və sinifdənxaric tərbiyə işi üzrə təşkilatçı vəzifəsində işləyib. Daha sonra Oğuz rayonu Sincan kənd tam orta məktəbində təşkilatçı müavin vəzifəsində çalışıb. Rəvan Lətifov noyabrın 6-da Daşaltı-Şuşa istiqamətində qəhrəmancasına şəhid olub. Şəhid “Vətən uğrunda”, "Şuşanın azad olunmasına görə” və “Cəsur döyüşçü” medalları ilə təltif olunub.
Quliyev Əvdil Qardaşxan oğlu 31 iyul 1972-ci ildə Beyləqan rayonunun Təzəkənd kəndində anadan olub. 2018-ci ildən etibarən Ə.Məmmədov adına Təzəkənd kənd tam orta məktəbində gənclərin çağırışaqədərki hazırlığı fənninin tədrisi ilə məşğul olub. O, 6 noyabr 2020-ci ildə Şuşakənd istiqamətində gedən döyüşlərdə şəhid olan zabit yoldaşına kömək etmək istəyərkən düşmən tərəfindən açılan snayper atəşi ilə şəhid olub. Əvdil Quliyev ölümündən sonra "Vətən uğrunda" və "Şuşanın azad olunmasına görə" medalı ilə təltif olunub.
İsmayılov Rabil Elbrus oğlu 1980-cı il fevralın 12-də Gəncə şəhərində anadan olub. 2017-ci ildən Gəncə şəhər M.Müşfiq adına 14 nömrəli tam orta məktəbdə riyaziyyat müəllimi olaraq çalışırdı. O, noyabrın 3-də Xocavənd döyüşləri zamanı şəhid olub. Rabil İsmayılov ölümündən sonra "Vətən uğrunda" və "Cəbrayıl azad olunmasına görə", "Xocavəndin azad olunmasına görə", və "Füzulinin azad olunmasına görə", medalı ilə təltif olunub.
Qurbanov Emil Vaqif oğlu 1980-ci il avqustun 25-də Lənkəranda anadan olub. 2005-ci ildə "Zirvə" idman kompleksində məşqçi-müəllim işləməyə başlamış, idman müəllimi kimi müxtəlif yarışlarda iştirak etmişdi. Daha sonra Lənkəran Şəhər Uşaq Gənclər İdman Məktəbində məşqçi-müəllim vəzifəsinə təyin olunub. 2012-ci ildə Lənkəran şəhər A.Məhərrəmov adına 7 nömrəli tam orta məktəbində gənclərin çağırışaqədərki hazırlığı müəllimi vəzifəsində işləməyə başlayıb. Oktyabrın 29-da Qubadlının düşməndən azad olunması uğrunda döyüşdə şəhid olub. Emil Qurbanov ölümündən sonra “Vətən uğrunda” və "Cəbrayılın azad olunmasına görə", "Qubadlının azad olunmasına görə" medalları ilə təltif olunub.
Müzəffərli Kənan Azər oğlu 22 dekabr 1995-ci ildə Gədəbəy rayonun Çalburun kəndində anadan olub. 15 sentyabr 2019-cu ildən Gədəbəy rayonun Dəyəqarabulaq kənd tam orta məktəbində müəllim kimi çalışıb. O, 27 oktyabr 2020-ci ildə Zəngilan uğrunda gedən döyüşlərdə şəhid olub. Şəhid Kənan Müzəffərli ölümündən sonra “Vətən uğrunda” və "Cəbrayılın azad olunmasına görə" medalları ilə təltif olunub.
Məmmədli Həsən Qəhrəman oğlu 8 iyul 1995-ci ildə Samux rayonunda anadan olub. Subay idi. Samux rayonu Çobanabadlı kənd tam orta məktəbində təsərrüfat müdiri vəzifəsində işləyirdi. Həsən Məmmədli 5 noyabr 2020-ci ildə Laçın rayonu istiqamətində döyüş tapşırığının yerinə yetirilməsi zamanı şəhid olub. O, ölümündən sonra "Vətən uğrunda", "Cəbrayılın azad olunmasına görə", "Qubadlının azad olunmasına görə", "Hərbi xidmətlərə görə" medalı ilə təltif edilib.
Sarıyev Tural İsmayıl oğlu 1993-cü il mayın 10-da Tovuz rayonunun Cirdək kəndində anadan olub. O, Tovuz rayonu Hacılar kənd orta məktəbinin texniki işçisi kimi fəaliyyət göstərib. Tural Sarıyev oktyabrın 16-da Qubadlı döyüşləri zamanı şəhid olub. Ölümündən sonra "Vətən uğrunda", "Cəbrayılın azad olunmasına görə", "Hərbi xidmətlərə görə" medalı ilə təltif edilib.
Adgözəlov Ceyhun Çoban oğlu 12 oktyabr 1994-cü ildə Saatlı rayonunun Azadkənd kəndində anadan olub. Əslən Şamaxı rayonundan idi. Sərbəst güləş üzrə bir sıra rayon, məktəb turnirlərində yer tutub. Bakı şəhəri Respublika Uşaq-Gənclər Məktəbinin gözətçisi vəzifəsində çalışırdı. Ceyhun Adgözəlov 6 noyabr 2020-ci ildə döyüş tapşırığının yerinə yetirilməsi zamanı həlak olubr. Ölümündən sonra "Vətən uğrunda", "Şuşanın azad olunmasına görə", "Cəsur döyüşçü", "Cəbrayılın azad olunmasına görə" və "Xocavəndin azad olunmasına görə" medalları ilə təltif edilib.
Əhmədov Vidadi Murad oğlu 1979-cu il iyulun 12-də Salyan şəhərində anadan olub. Salyan Peşə Liseyinin texniki işçisi olaraq çalışıb. Vidadi Əhmədov oktyabrın 12-də Füzuli döyüşləri zamanı şəhid olub. Ölümündən sonra "Vətən uğrunda", "İgidliyə görə" və 3-cü dərəcəli "Rəşadət" ordeni ilə təltif edilib.
