Avropa “yaşıl” keçid çərçivəsində Azərbaycanla əməkdaşlığı inkişaf etdirməyi planlaşdırır.
1xeber.media xəbər verir ki, bunu Bakıda keçirilən Cənub Qaz Dəhlizi Məşvərət Şurasının 11-ci nazirlər iclası və Yaşıl Enerji Məşvərət Şurasının 3-cü nazirlər iclasının yekunlarına dair mətbuat konfransında Avropa İttifaqının enerji və mənzil məsələləri üzrə komissarı Dan Yorgensen deyib.
"Biz yaşıl keçid üzərində sıx əməkdaşlıq edirik. İqtisadiyyatımızı karbonsuzlaşdırmalıyıq. Bizim çox iddialı hədəfimiz var - 2050-ci ilə qədər karbon neytrallığına nail olmaq. 2040-cı ilə qədər emissiyaları 90 faiz azaltmalıyıq. Bu, əlbəttə ki, dostlar və tərəfdaşlarla bərpa olunan enerji və enerji səmərəliliyi sahəsində əməkdaşlığın bizim üçün böyük əhəmiyyət kəsb etməsi deməkdir. Bu, bu günün əsas mövzularından biridir. Gələcəkdə biz bu etibarlı və güclü əlaqələri inkişaf etdirmək istəyirik", - o bildirib.
Yorgensen qeyd edib ki, Azərbaycan qazı Avropanın Rusiya qazından asılılığını azaltmağa kömək edir.
"Mən buna görə həqiqətən minnətdaram və əməkdaşlığımızın qarşılıqlı faydasına inanıram. Biz bunu gələcəkdə də davam etdirmək və bəlkə də genişləndirmək istəyirik", - o deyib.
