Yunanıstan-Bolqarıstan İnterkonnektoru təbii qaz tədarükünün təhlükəsizliyinin və şaxələndirilməsinin təmin olunması baxımından həm Bolqarıstan, həm də bütün region üçün həlledici rol oynamağa davam edir.
Bunu IGB operatoru ICGB şirkətinin icraçı direktoru Teodora Qeorgiyeva Cənub Qaz Dəhlizi üzrə Məşvərət şurasının aprelin 4-də Bakıda keçiriləcək iclası ərəfəsində Trend-ə verdiyi özəl müsahibədə deyib.
"Cənub Qaz Dəhlizinin qarşıdakı iclasında bizim müzakirəyə çıxaracağımız əsas prioritetlərdən biri təkcə Bolqarıstan üçün yox, həm də bütün Cənub-Şərqi Avropa regionu üçün Azərbaycandan əlavə qaz həcmlərinin tədarükünün təmin olunması potensialının artırılması olacaq. Azərbaycan strateji və etibarlı tərəfdaş olaraq artıq IGB vasitəsilə Bolqarıstanın qaza olan tələbatının 40%-dən çoxunu ödəyib. Bu həm bu marşrutun nə dərəcədə vacib olduğunu, həm də onun sabitliyinə olan etibarın səviyyəsini göstərir", - deyə o bildirib.
Qeorgiyeva qeyd edib ki, şirkət eyni zamanda ICGB-nin əsas iştirakçılarından biri olduğu Şaquli Qaz Dəhlizi (VGC) çərçivəsində uzunmüddətli əməkdaşlığa böyük önəm verir.
“TAP-la birləşmə və Cənub Qaz Dəhlizinin daha geniş infrastrukturu şərqdən şimala strateji qaz axınını təmin edir ki, bu da təkcə Bolqarıstan üçün deyil, həm də Mərkəzi və Şərqi Avropa üçün, eləcə də Transbalkan Qaz Kəməri vasitəsilə Ukrayna və Moldovaya mümkün çıxışı təmin edir", - deyə icraçı direktor qeyd edib.
O əlavə edib ki, ICGB, Şaquli Qaz Dəhlizi təşəbbüsü çərçivəsində IGB-nin genişləndirilməsi üçün hazırlıq işlərini davam etdirir.
"Biz hesab edirik ki, bu, Avropanın enerji təhlükəsizliyi və müstəqilliyinə töhfə verəcək strateji, uzaqgörən bir qərardır. Stara Zaqoradakı qaz ölçmə stansiyasının genişləndirilməsi üzrə texniki layihə tamamlanıb, Komotinidəki sahəsi üçün texniki spesifikasiyalar hazırlanıb və icazə prosedurları yenilənir. Layihənin icrasına "yaşıl işıq" veriləndən dərhal sonra heç bir gecikmə olmadan başlanmasını təmin etmək üçün satınalma sənədləri üzərində iş aparılır. Layihənin dəstəklənməsi üçün qrant əsasında maliyyələşmənin əldə edilməsi şirkətin üstünlük verdiyi variantdır, bu isə genişləndirmənin maliyyələşdirilməsi məsələsində açıq qalan məsələlərdən biridir. Bu, şəbəkə istifadəçiləri üçün yüksək rəqabət qabiliyyətli modelin saxlanılması baxımından son dərəcə vacibdir", - deyə Georgieva bildirib.
O həmçinin əlavə edib ki, 2025-ci il üçün qaz kəmərinin texniki xidmət məqsədilə dayandırılması planlaşdırılmır: "Əsas diqqət qaz kəmərinin fasiləsiz işləməsinin təmin olunmasına, eyni zamanda əməliyyat davamlılığımızın və hazırlığımızın gücləndirilməsinə ayrılır".
