Bakı şəhər sakini Quliyev Yusif Qulu oğlu “PİLOT-16” MMC-dən şikayətçidir.
Bu barədə Y. Quliyev iddia edir ki, şirkət Bakı şəhəri, Nəsimi rayonu, Novruzov qardaşları küçəsi 55 ünvanında yerləşən və həyat yoldaşı Məhbubə Quliyeva Əli qızının adına olan evini söküb:
“Həmin fərdi yaşayış evinin 008011000691-10301 reyestr nömrəli, 17.03.2021-ci il tarixli çıxarışı var. Aramızda heç bir razılaşma olmadan, eləcə də Bakı şəhəri Nəsimi Rayon Məhkəməsinin 06.04.2023-cü il tarixli, 2(006)-972/2023 saylı qərarına əsasən, bizə məxsus torpaq sahəsinin ərazisində “PİLOT-16” MMC-nin qazıntı, söküntü və tikinti işləri aparmasının qadağan edilməsinə, həmçinin Bakı Apellyasiya Məhkəməsinin İnzibati Kollegiyasının 25.09.2023-cü il tarixli, 2-1(103)-271/2024 saylı qərarı ilə Bakı Şəhər İcra Hakimiyyətinin başçısının 04 mart 2020-ci il tarixli 51 saylı sərəncamının bizə məxsus fərdi yaşayış evinin yerləşdiyi 2,183 sot torpaq sahəsinə münasibətdə etibarsız sayılmasına baxmayaraq, 7 noyabr 2024-cü il tarixdə saat 13 radələrində evimiz ikinci dəfə (birinci dəfə 2023-cü il 18 mart) sökülərək məhv edilib.
Söküntü göstərişini “PİLOT-16” MMC-nin direktoru Quliyev Aslan Rafiq oğlu və “Haven Park” MMC-nin icraçı direktoru Həsənov İlqar Vidadi oğlu verib. Nəticədə bizə məxsus əmlaka 250 min manatdan çox zərər dəyib.
Söküntü ilə bağlı Bakı şəhəri, Nəsimi Rayon Prokurorluğunda toplanmış material üzrə fakta görə Azərbaycan Respublikası CM-nin 186.2.1 və 309.2-ci maddələri ilə cinayət işi başlansa da, 4 ay keçməsinə baxmayaraq, bizə dəymiş maddi ziyanın ödənilməsi və həmin əməli törətmiş Quliyev Aslan Rafiq oğlu, Həsənov İlqar Vidadi oğlunun təqsirləndirilən şəxs qismində cəlb edilərək barələrində həbs qətimkan tədbirinin seçilməsi təmin edilməyib.
Eyni zamanda 4 ay keçməsinə baxmayaraq, başlanmış cinayət işinin istintaqı tamamlanaraq, məhkəməyə verilməsi təmin edilmir.
Bunun nəticəsidir ki, həmin gündən sonra “PİLOT-16” MMC bizə məxsus fərdi yaşayış evinin yerləşdiyi torpaq sahəsinin ərazisində ağır texnika ilə tikilməsi nəzərdə tutulan hündürmərtəbəli binanın bütün bünövrə qazıntı işləri aparılıb və binanın bünövrəsinin qoyulması üçün beton tökülüb. Hazırda həmin işlər davam etdirilir”.
Şikayətçi bildirib ki, söküntüdən əvvəl şirkətlə vətəndaş arasında kompensasiya ilə bağlı hansısa razılıq olmayıb.
Vətəndaşın sözlərinə görə, söküntü zamanı ona 61 min ziyan dəyib. Şirkət həmin pulu ödəyib:
“Pulu depozitə qoydular, məhkəmənin sonunda götürəcəyəm”.
Məsələ ilə bağlıPİLOT-16” MMC-nin direktoru Aslan Quliyevlə əlaqə saxlayıb. O, şikayətə belə reaksiya verib:
“Həmin vətəndaş bizim sahədə işləyən ekskavatora “molotov kokteyli” ataraq yandırıb. Nəsimi Rayon Məhkəməsində bununla bağlı cinayət işi açılıb.
Şəxsin evi 98 kvadratmetrdir. Biz Yusif Quliyevlə görüşüb ona kompensasiya təklif etmişik. Söküntü zamanı evə vurduğumuz ziyana görə ona 70 min ödəmişik, hazırda depozitindədir. Kompensasiya kimi 600 min də nağd təklif etmişik. Ümumilikdə 670 min verməyə hazırıq, lakin o, razılaşmır, bizdən 1 milyon pul istəyir. Bunun müqabilində ekskavatora dəyən zərəri ödəmək istəmir.
Biz həmin evin yanında 20-yə yaxın ev almışdıq. 70 minlik zərər həmin evlərin söküntüsü zamanı bu evə dəymişdi.
“Haven Park” MMC layihəsi isə 5 il bundan öncə bitib. İlqar Həsənov “PİLOT-16” MMC-nin iş nəzarətçisidir”. \\Musavat.com
