Şirvan Apellyasiya Məhkəməsində hakim Habil Bəhmənovun sədrliyi ilə Kürdəmirin sabiq icra başçısı Ceyhun Cəfərovun həyat yoldaşının şikayətinə baxılıb.
1xeber.media xəbər verir ki, sabiq icra başçısının həyat yoldaşı Xəzər rayonu, Şüvəlan qəsəbəsində yerləşən 12 sot torpaq sahəsinin qaytarılmasını tələb edir.
Həmin torpaq sahəsi Ceyhun Cəfərov korrupsiya əməllərinə görə həbsə alınandan sonra bu və digər əmlakları xüsusi müsadirəyə götürülüb, üzərlərinə həbs qoyulub.
Şikayətçi məhkəmədən xahiş edib ki, Ceyhun Cəfərov barəsindəki hökm həyətyanı torpaq sahəsinin xüsusi müsadirə edilməsi hissədə ləğv edilsin və əmlak üzərində olan həbsi götürülsün. Apellyasiya instansiyası şikayətin dəlillərini araşdıraraq əsassız olması qərarına gəlib, apellyasiya şikayəti təmin edilməyib.
Qeyd edək ki, Ceyhun Cəfərov 2020-ci ilin avqustunda Baş Prokuror yanında Korrupsiyaya qarşı Mübarizə Baş İdarəsinin əməkdaşları tərəfindən həbs olunub.
Əməliyyat zamanı icra başçısı Ceyhun Cəfərov, başçının birinci müavini Tacəddin Novruzov, Ərazi idarəetmə şöbəsinin müdiri Natiq Kərimov və digər vəzifəli şəxslərin saxlanılıb. Hər üç şəxsə Cinayət Məcəlləsinin 308.2-ci (vəzifə səlahiyyətlərindən sui-istifadə), 311.3.1-ci (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma), 311.3.2-ci (təkrar rüşvət alma) və 311.3.3-ci (külli miqdarda rüşvət alma) maddələri ilə ittiham verilib və barələrində həbs qətimkan tədbiri seçilib.
Həbsindən sonra Ceyhun Cəfərovun müsadirəyə götürülən mal-mülk siyahısı da ictimailəşdirilmişdi.
Müsadirə edilən əmlakların siyahısını təqdim edirik:
Bakı şəhəri, Xəzər rayonu, Türkan qəsəbəsi, Rabitə Nazirliyinin Poçt Daşıma Mərkəzinin bağçılıq yoldaşlığın I sektor 02 saylı bağ sahəsində yerləşən 0,0370 ha torpaq sahəsi
Şüvəlan qəsəbəsində yerləşən 0,12 ha həyətyanı torpaq sahəsi
Kürdəmir rayonu, Atakişili kəndində yerləşən fərdi yaşayış evi
Kürdəmir rayonu, Pirili kəndində yerləşən 6,94 ha kənd təsərrüfat təyinatlı və 0,48 ha həyətyanı torpaq sahələri
Kürdəmir rayonu Karrar kəndində 2,07 ha kənd təsərrüfat təyinatlı torpaq sahəsi
Kürdəmir şəhəri, Bakı prospektində 0,0042 ha torpaq sahəsi
Kürdəmir şəhəri, Xalid Qənbərov küçəsi 15 ünvanında yerləşən 0,15 ha həyətyanı torpaq sahəsi
Kürdəmir şəhəri, Xalid Qənbərov küçəsi 17 ünvanında yerləşən 0,10 ha həyətyanı torpaq sahəsi
Bakı şəhəri, Binəqədi rayonu, Biləcəri qəsəbəsi, Şimal hissəsi 80 saylı ünvanda yerləşən 0,0300 ha torpaq sahəsi
Bakı şəhəri, Binəqədi rayonu, Şövkət Məmmədova küçəsi ev 7 ünvanında yerləşən 83 nömrəli mənzil
Bakı şəhəri, Binəqədi rayonu, İ.Dadaşov küçəsi 74 ünvanında yerləşən 41,5 kv.m qeyri-yaşayış binası
Ceyhun Cəfərov və suç ortaqları Lənkəran Ağır Cinayətlər Məhkəməsində mühakimə olunublar. Lənkəran Ağır Cinayətlər Məhkəməsinin hökmü ilə Ceyhun Cəfərov, Tacəddin Novruzov və Natiq Kərimovun hər biri 8 il 6 ay, Eynulla Novruzov, Məhəmməd Musayev, Mətləb Allahverdiyev, Rəsəb Hüseynovun hər biri 8 il üç ay, Emin Sadıqov 4 il, Sərvər Məmmədov 2 il 6 ay azadlıqdan məhrum edilib. Təqsirləndirlilən Məhəmməd Surxayev isə 3 il müddətinə azadlığın məhdudlaşdırılması şərti ilə 2 min manat cərimə olunub.
Sonradan Ceyhun Cəfərovun dövlətə vurulan ziyanı ödəməsi nəzərə alınaraq, Şirvan Apellyasiya Məhkəməsi cəza müddətini 6 ilə endirib, daha sonra Ali Məhkəmə qərarı ilə bu müddət 4 il 6 aya qədər azaldılıb. Cəza müddətində Ceyhun Cəfərov 2 ilini təcridxanada, 1 il 2 ayını ümumi rejimli cəza müəssisəsində, qalan 1 il 2 ayını isə məntəqə tipli cəzaçəkmə müəssisəsində keçirib. Məhkum son aylarda müdriyyətin icazəsi ilə müəyyən vaxtlarda cəzaçəkmə müəssisəsindən kənara çıxa bilirdi. Ceyhun Cəfərovla birlikdə həbs olunan birinci müavini Tacəddin Novruzov azadlığa buraxılıb.
Ceyhun Cəfərov və Tacəddin Novruzova qarşıdakı 2 il 6 ay müddətində dövlət və yerli özünüidarəetmə orqanlarında vəzifə tutmaq qadağan edilib.Musavat.com
