Bildiyimiz kimi, son zamanlar bank kartlarından külli miqdarda vəsait oğurlanır. Oğurluq əsasən “Kapital Bank”ın kartından edilir.
Vətəndaşlar artıq adıçəkilən bankda vəsait saxlamaqda ehtiyat edirlər. Təəssüf ki, baş verən oğurluqla bağlı konkret cavab əldə etmək mümkün olmur.
Niyə məhz “Kapital Bank”? Səbəb nədir?
Globalinfo.az-a danışan informasiya texnologiyaları üzrə mütəxəssis Elvin Həsənovun fikrincə, edilən oğurluqların əsasən “Kapital Bank”a aid kartlardan olması ilk növbədə bu bankın ölkədə ən geniş istifadəçi bazasına malik olması ilə əlaqədardır.
Onun sözlərinə görə, əgər ölkədə ən çox kart həmin bank tərəfindən verilibsə, təbii ki, dələduzlar da kütləvi şəkildə bu istifadəçiləri hədəf seçəcəklər:
“Bu, texniki zəiflikdən deyil, daha çox statistik ehtimalla bağlıdır. Yəni fişinq hücumları zamanı çoxlu sayda insanın məlumatına çıxmaq istəyən kiberdələduzlar ən çox istifadə olunan bankı seçirlər ki, şansları daha yüksək olsun. Digər tərəfdən, istifadəçilərin texnoloji savadlılığının az olması, məlumatların hər kəsə rahatlıqla verilməsi, təsadüfi linklərə kliklənməsi də bu problemləri artırır”.
Mütəxəssis deyib ki, burada əsas məsuliyyət yalnız bankın deyil, həm də istifadəçilərin üzərinə düşür:
“Buna görə də vacib olan əsas məqam maarifləndirmədir. Vətəndaş bilməlidir ki, heç bir bank əməkdaşı ondan kart məlumatı, PIN və ya SMS kodu tələb etmir. Belə hallar yaşandıqda həmin şəxslərlə danışmamaq, məlumat paylaşmamaq və dərhal aidiyyəti orqanlara xəbər vermək ən düzgün addım olacaq”.
Məsələ ilə bağlı “Kapital Bank”a sorğu ünvanlanıb.
