Kirayə mənzillərlə bağlı problem vaxtaşırı ictimai müzakirələrə səbəb olur. Paytaxta üz tutan vətəndaşların əksəriyyəti yüksək icarə haqlarından narazılıq edir. Lakin hər il tələbələr yay tətilinə çıxdıqda və ya təhsillərini başa vurub bölgələrə qayıtdıqda, qiymətlər nisbətən ucuzlaşır.
Bu il vəziyyət necə olacaq?
Globalinfo.az-a danışan əmlak məsələləri üzrə ekspert Elnur Azadov deyib ki, Bakı və ətraf ərazilərdəki daşınmaz əmlakın təxminən 17-18 faizi kirayə fonduna daxildir:
“Lakin qiymət artımına görə tələbələr yay mövsümündə mənzilləri tərk etməməyə çalışırlar. Ötən il boşalan mənzillərin sayı təxminən iki dəfə azalmışdı. Məsələn, bu gün 500 manata kirayə verilən mənzildən tələbə 2-3 aylıq tətil səbəbindən çıxır və geri döndükdə eyni qiymətə yenidən ev tapa biləcəyini düşünür. Qayıdanda isə həmin məbləğə mənzil tapmaq mümkün olmur, çünki qiymətlər artıq yüksəlir”.
Ekspert bildirib ki, ilin sonunda kirayə mənzil bazarında dəyişiklik gözlənilir:
“Bakıda qəzalı vəziyyətdə olan 194 bina artıq riskli kimi qeydə alınıb. Fikrimcə, yaxın 6 ay ərzində sökülmə prosesinə başlanılacaq. Praktikaya görə, paytaxtda 2017-ci ildə evlərin qiyməti kəskin bahalaşmışdı. Çünki həmin vaxt 100-ə yaxın binanın sökülməsi prosesi başladı. 194 binanın sökülməsi də baş verərsə, mənzil qıtlığı yaranacaq. Qiymətlər 15-20 faiz bahalaşacaq”.
