Dünya tarixə həkk olunacaq müharibələrə şahidlik edir. XXI əsrin birinci rübü demək olar ki, münaqişə və müharibələrlə əhatə olunub. İyunun 13-də İsrail dövləti İran İslam Respublikasına qarşı “Am Kelavi” (“Aslan kimi millət”) kod adlı hərbi əməliyyata başlayıb. Yaxın Şərqdə müharibə alovu günü-gündən artır. Dünya siyasəti ilə yanaşı, iqtisadiyyatı, turizmi və digər sahələri çətinliklərlə üzləşib.
Hər iki ölkədə səfərdə olan müxtəlif millətlərdən olan turistlər hava məkanının bağlı olması səbəbindən vətənlərinə qayıda bilmir. Bu da birbaşa turizm sahəsinin inkişafına mənfi təsir göstərir.
Turizm üzrə ekspert Məcid Məcidov "Unikal"a açıqlamasında bildirib ki, dünyada baş verən proseslər turizm sahəsinə mənfi təsir göstərib:
"İsrail və İran arasında gərginləşən münasibətlər, regionda müharibə ehtimalını artıraraq turizm sahəsinə ciddi mənfi təsirlər göstərib. Xüsusilə təhlükəsizlik narahatlıqları səbəbilə bir çox ölkə öz vətəndaşlarına İsrail və ətraf bölgələrə səyahət etməməyi tövsiyə etmişdir. Bu isə turizm axınının azalmasına, otellərdə və turizm xidmətlərində geriləməyə səbəb olub.
Eyni zamanda, davam edən hərbi toqquşmalar və hava hücumları nəticəsində hava məkanının bağlanması və ya məhdudlaşdırılması, həm yerli, həm də xarici turistlərin bölgəni tərk etməsini çətinləşdirib. Bir çox turist planlaşdırdıqları səfərləri ya təxirə salır, ya da ləğv edir. Müharibə təhlükəsi altında olmaq hissi insanların səyahət etmək istəyini azaldır və bu, turizm sənayesində iqtisadi tənəzzülə səbəb olur".
İsrail-İran müharibəsi ölkəmizdə turizm sahəsinə necə təsir göstərib? - AÇIQLAMA
Ekspert onu da əlavə edib ki, sözügedən ölkələr əsasən, İsrail, İran, Oman, İraq, BƏƏ, Yəmən, Pakistan, Hindistan və Küveytdən olan turistlərdir.
"İsrail və İran arasında baş verən silahlı Cənubi Qafqaz ölkələrinə, xüsusilə Azərbaycana turist axınına da mənfi təsir göstərib. Beynəlxalq səyahətçilər bu regiona yaxın ölkələrdəki müharibə və qeyri-sabitlik səbəbindən səfərlərini təxirə salır və ya başqa, daha təhlükəsiz hesab etdikləri istiqamətlərə yönəlirlər. Üstəlik, bəzi aviaşirkətlər Yaxın Şərq və yaxın coğrafiyaya uçuşları məhdudlaşdırdığından, Azərbaycana birbaşa və ya rahat səyahət imkanları da azalır.
Turistlər üçün əsas prioritetlərdən biri təhlükəsizlikdir. İsrail-İran gərginliyinin Azərbaycanla coğrafi yaxınlığı, həmçinin regionun geosiyasi həssaslığı, ölkəyə gələn turist sayında nəzərəçarpacaq azalmaya səbəb olmuşdur. Bu, yerli turizm sektoruna, xüsusilə otel, restoran, turizm agentlikləri və xidmət sahələrinə iqtisadi təsir göstərir. Hətta günlük kirayə verilən evlərin, hotellərin qiyməti 50%-dək düşüb".
