Sabiq səhiyyə naziri Oqtay Şirəliyev vəfat edib. Onun rəhbərliyi dövründə Azərbaycan səhiyyəsində aparılan islahatlar və həyata keçirilən layihələr geniş müzakirə mövzusu olub. Bəs sabiq nazirlər Oqtay Şirəliyevi necə xatırlayır?
1xeber.media xəbər verir ki,globalinfo.az- danışan sabiq təhsil naziri Misir Mərdanov Oqtay Şirəliyevi səhiyyə naziri təyin olunduğu gündən çox yaxşı tanıdığını bildirib:
“Onunla dəfələrlə görüşmüş, birgə tədbirlərdə iştirak etmişik. Müxtəlif problemlərin həllində, proqramların həyata keçirilməsində bir yerdə olmuşuq. Həmişə onu müsbət, səmimi və işinə məsuliyyətlə yanaşan bir şəxs kimi xatırlayıram. Təhsil Nazirliyinin, o cümlədən mənim və ali məktəb rektorlarının təkliflərinə hər zaman ciddi və qayğıkeş münasibət göstərən bir insan idi. Oqtay Şirəliyev işinin peşəkarı, elmlər doktoru, professor kimi həm Respublika Diaqnostika Mərkəzinin qurulmasında, həm də ümumilikdə ölkə səhiyyəsinin inkişafında mühüm xidmətlər göstərmiş bir şəxsiyyət idi”.
M.Mərdanov vəzifədən getdikdən sonra da Oqtay Şirəliyevlə əlaqələrinin davam etdiyini qeyd edib:
“Bayramlarda və ailə üzvlərimin sağlamlığı ilə bağlı müraciətlərim zamanı hər dəfə diqqət, qayğı və hörmət görmüşəm. Təəssüf ki, çox az yaşadı. Çoxlarının sağlamlığını qoruyan Oqtay müəllim öz sağlamlığını axıra qədər qoruya bilmədi. Allah ona qəni-qəni rəhmət eləsin. Çox dəyərli bir həkimi, peşəkar səhiyyə təşkilatçısını itirdik. Onun ailəsinə, həyat yoldaşına və övladlarına dərin hüznlə başsağlığı verirəm. Məkanı cənnət olsun”.
Sabiq mədəniyyət naziri Əbülfəz Qarayev Oqtay Şirəliyevlə bir neçə il birgə çalışdıqlarını deyib:
“Oqtay Şirəliyevə istər tanışlarım, istərsə də mədəniyyət işçilərinə tibbi yardımla bağlı müraciət etdikdə həmişə kömək əlini uzadardı. Çalışardı ki, dəstək olsun. Çox yaxşı, alicənab və səmimi bir insan idi. Bəzən müxtəlif layihələri birgə müzakirə edirdik, hər zaman təmkinli və anlayışlı davranırdı. Aramızda heç vaxt ziddiyyət və ya narazılıq olmayıb. Həmişə xoş sözlərlə bir-birimizə müraciət etmişik, bayramlarda, ad günlərində təbrikləşmişik, ailələrimizlə də tanış olmuşuq. Kolleqam idi. Məndən yaşca böyük olsa da, ona daim hörmətlə yanaşmışam. Allah rəhmət eləsin! Oqtay müəllim yaxşı insan, dəyərli həmkar və nümunəvi ziyalı idi”.
Sabiq xarici işlər Elmar Məmmədyarov Oqtay Şirəliyevin savadlı və peşəkar bir şəxs olduğunu vurğulayıb:
“Onun haqqında yalnız müsbət sözlər demək olar. Aramızda dostluq münasibəti olmasa da, görüşəndə səmimi şəkildə dərdləşər, müxtəlif mövzularda söhbət edərdik. Hər zaman işinə məsuliyyətlə yanaşan, dəyərli insan kimi yadda qalıb”.
