Zəfərimizin və “Mənim Oğlum Qəhrəmandır!” – “Mənim Atam Qəhrəmandır!” layihələrinin 5 illiyi münasibətilə keçirilən tədbirdə “Mənim Oğlum Qəhrəmandır!” layihəsinin himni təqdim olundu.
Sözləri: Mircəlal Qurbanov
Musiqisi: Cəmal Qurbanov
İfaçılar:
Xalq artistləri Azərin, Azər Zeynalov,
Muğam ifaçımız Əhəd Ağayev,
Şəhid övladları və Çağangir–Çağangirov adına xor kollektivi.
Şəhid analarının qəlbindəki səsi Azərin xanım, şəhid atalarının səsi isə Azər Zeynalov oldu.
Onlar o mahnını sadəcə ifa etmədilər, o səsdə Vətənin ağrısı, fəxri və Zəfəri vardı. Bu təqdimat bir mahnının deyil, bir millətin ruhunun səhnədə canlanması idi.
Tədbirdə ölkəmizin müxtəlif bölgələrindən, ucqar kəndlərindən, eləcə də Naxçıvandan və Gürcüstandan gələn, I və II Qarabağ müharibəsi, Aprel və Tovuz döyüşləri, eləcə də Antiterror əməliyyatları zamanı övladlarını Vətən uğrunda şəhid vermiş analar iştirak edirdilər.
Artıq beş ildir ki, “Mənim Atam Qəhrəmandır!” və “Mənim Oğlum Qəhrəmandır!” layihələri çərçivəsində Vətən uğrunda canından keçmiş qəhrəmanlarımızın xatirəsi uca tutulur, onların ailələri bir araya gətirilir. Bu illər ərzində keçirilən silsilə tədbirlərdə 5000-ə yaxın şəhid anası və 1700-dən çox şəhid övladı iştirak edib. Xüsusilə qeyd etmək lazımdır ki, 2025-ci ilin Ramazan ayı ərzində Heydər Əliyev Fondunun dəstəyi ilə dörd dəfə təşkil olunan “Mənim Oğlum Qəhrəmandır!” görüşlərində Azərbaycanın bütün bölgələrindən olan 2000-ə yaxın şəhid anası bir araya gəlib.
Eləcə də, Zəfərin 5 illiyi münasibətilə keçirilən bu möhtəşəm tədbirdə 500-dən artıq şəhid anası iştirak edib. Bu tədbirdə ilk dəfə qatılan analar arasında ucqar kəndlərimizdən, müxtəlif rayonlardan, Naxçıvandan və Gürcüstandan gəlmiş şəhid analarımız da var idi.
Heydər Əliyev Fondunun vitse-prezidenti Leyla Əliyevaya, Bakı Media Mərkəzinin rəhbəri Arzu Əliyevaya və artıq 5 ildir bu layihənin ilk günündən daim yanımızda olan, layihəmizə sevgisini, dəstəyini və qayğısını əsirgəməyən Heydər Əliyev Fondunun icraçı direktoru Anar Ələkbərova səmimi təşəkkürümüzü bildiririk.
Onların hər biri Vətənin bu böyük Zəfər bayramını bir ailə kimi birlikdə qeyd etdilər. Daima şəhid analarının yanında olan, onlara sevgi, şəfqət və mərhəmətlə qucaq açan Leyla xanım Əliyeva bu anaların qəlbində bir ümid, bir övlad, bir işıq simvoluna çevrilib.
O, hər dəfə şəhid ailələri ilə görüşlərdə şəhid analarına və şəhid övladlarına yaxınlaşaraq, onları sevgi ilə dinləyir, hər birini bağrına basır. Onun səmimiliyi və sadəliyi şəhid ailələrinin qəlbinə yol açır, onların ağrılarını yumşaldır, könüllərinə istilik gətirir.Tədbir çərçivəsində ilk dəfə olaraq Anar Ələkbərovun ideya və ssenari müəllifi olduğu “44” bədii filminin treyleri şəhid analarının və atalarının qarşısında təqdim olundu.
“44” — Azərbaycan kino tarixində yeni bir mərhələnin başlanğıcını göstərən, İkinci Qarabağ müharibəsinin qəhrəmanlıq dolu səhifələrini, Ordumuzun şanlı Zəfərini və bu Zəfərin arxasında dayanan əzm, birlik və Vətən sevgisini canlandıran möhtəşəm ekran əsəridir.
Filmin əsas hissəsi azad edilmiş ərazilərdə, real döyüşlərin baş verdiyi məkanlarda lentə alınıb. O, təkcə müharibədən deyil, həm də insanlıq, sevgi və mənəvi gücdən danışır. Bu film Ali Baş Komandanımıza, qəhrəman şəhidlərimizə və onların müqəddəs adını yaşadan şəhid analarına həsr olunub. “44” — bir tarix, bir qürur, bir minnətdarlıq salnaməsidir.
Anar Ələkbərov illərdir ölkə başçısı cənab İlham Əliyev və Heydər Əliyev Fondunun Prezidenti Mehriban Əliyeva ilə şəhid ailələri və qazilər arasında sarsılmaz bir mənəvi körpüdür.
O, bu ailələrin hər birini diqqətdə saxlayan, onların sevincini, ağrısını, qayğısını bölüşən bir insandır. Anar müəllim tez-tez şəhid ailələrini ziyarət edir, onların səsini dinləyir, ehtiyaclarını öyrənir, şəhid analarının əllərindən öpür, övladlarını sevgi ilə qucaqlayır.
Qeyd edək ki, tədbirin sonunda Azərbaycanın Xalq artistləri Alim Qasımov, Zülfiyyə Xanbabayeva, Natiq Şirinov, tanınmış müğənni Mirələm Mirələmov və şəhid övladlarının birgə ifasında “Zəfər” mahnısı səsləndirildi.
Tədbir iştirakçıları — şəhid anaları, qazilər və qonaqlar əllərində üçrəngli Azərbaycan bayrağını qaldıraraq ayağa qalxdılar. Mahnının sədaları altında zalı qürur, minnətdarlıq və Vətən sevgisi bürüdü.
O an hər kəs bir daha hiss etdi ki, bu Zəfər — xalqın birliyinin, şəhidlərin qanı ilə yazılmış azadlığın rəmzidir. Bu Zəfər — Azərbaycanın sonsuz qürurudur.
“Mənim oğlum qəhrəmandır” layihəsi bir Birlik Layihəsidir. O minlərlə şəhid anasını, atasını, övladını və xanımını bir ailə kimi birləşdirən, onları doğmalaşdıran, ürəkləri birləşdirən müqəddəs bir missiyadır. Bu layihə Vətənin, xalqın və şəhidlərin ruhundan doğub və bu ruh, bu sevgi hər zaman yaşayacaq!
Mircəlal QURBANOV,
“Mənim Oğlum Qəhrəmandır!” və “Mənim Atam Qəhrəmandır!” layihələrinin rəhbəri
