Son günlər Azərbaycanda müəllimlərin digər peşə sahibləri kimi məktəbdə 8 saatlıq tam iş rejimi ilə çalışması təklifi geniş müzakirə olunur. Elm və təhsil naziri Emin Əmrullayev isə bu kontekstdə bəyan edib ki, “tam ştatlı müəllim” modeli, yəni gündəlik 8 saatlıq iş rejimi məktəbdə müəllimin “tam hüquqlu işçi” olduğunu hiss etməsinə xidmət etməlidir. Bu yanaşma həm tədris prosesinin təşkilində, eləcə də müəllimin peşəkar fəaliyyətinin dəyərləndirilməsində yeni mərhələnin başlanğıcı kimi təqdim olunur. Təxminən 20 minə yaxın müəllimin bu prosesə cəlb olunması nəzərdə tutulur.
Yeni modelin tətbiqi ilə bağlı gözləntilər və narahatlıqlar isə təhsil sistemində balansın, iş yükünün və motivasiya mexanizmlərinin yenidən düşünülməsini aktuallaşdırır. Maraqlıdır, 8 saatlıq iş rejiminin tətbiqi müəllimlərin məktəbdəki tədris prosesindən uzaqlaşmasına və onların sayının azalmasına təsir göstərə bilərmi?
1xeber.media xəbər verir ki,mövzu ilə bağlı Modern.az-a danışan təhsil eksperti Elçin Əfəndi bildirib ki, 8 saatlıq iş rejimi bütün müəllimlərə təklif və şamil edilməyəcək.
“Əlbəttə, bu mərhələdə müəllimlərin prosesdən uzaqlaşması və sayının azalması mümkündür. Lakin bu, əsasən yalnız repetitorluq fəaliyyəti ilə məşğul olan müəllimlər arasında ola bilər. Digər tərəfdən, tədrisə həvəsi olan, auditoriyada işləmək istəyən müəllimlər təbii ki, təhsil sistemində fəaliyyətlərini davam etdirəcəklər”.
Ekspertin fikrincə, qarşıdakı illərdə şagird sayında da azalma gözlənilir:
“Bu isə əhalinin təbii artım dinamikası ilə bağlı bir faktordur. Şagird sayının azalması məktəblərdə bəzi sinif və fənn müəllimlərinin ixtisarı ilə nəticələnə bilər. Eyni zamanda, sertifikasiya məsələsi də bu mərhələdə mühüm rol oynayır. Nazirlik tərəfindən aparılan optimallaşdırma və rasionallaşdırma tədbirləri, bəzi məktəblərin və ya məktəbdaxili siniflərin bağlanması da pedaqoji heyətin müəyyən qədər azalmasına səbəb olacaq”.
O, həmçinin vurğulayıb ki, belə şəraitdə ali təhsil müəssisələrinin plan yerləri də uyğun şəkildə azaldılmalıdır:
“Plan yerləri elə formalaşdırılmalıdır ki, mövcud tələbi və təklifi düzgün qarşılasın.
Onu da bildirmək istərdim ki, bu qərar ilk növbədə kişi müəllimlərin təhsil sisteminə qayıdışını stimullaşdıracaq ki, bu da müsbət dəyişikliklərə səbəb olacaq. Müəllimlərin əməkhaqları yüksələcək, məktəblərdə real tədris mühiti formalaşacaq və şagirdlərin auditoriyada öyrənmək imkanları genişlənəcək. Bundan əlavə, ali təhsil müəssisələrinə hazırlıq prosesi də məktəblərin öz daxilində, ştat müəllimləri hesabına həyata keçiriləcək və bu fəaliyyət dövlət büdcəsi tərəfindən maliyyələşdiriləcək. Ümumilikdə, bütün bu addımlar həm müəllimlərin, həm də təhsilalanların akademik göstəricilərinə müsbət təsir göstərəcək”,- deyə E.Əfəndi qeyd edib.
