Analitiklər bildirir ki, 2025-ci ildə "Apple" "iPhone"un satışında tarixi göstəricilərə nail ola bilər.
1xeber.media xəbər verir ki, IDC-nin proqnozuna görə, şirkət "iPhone 17" seriyasına olan böyük tələb sayəsində 247 milyondan çox cihazı bazara çıxara bilər.
"Apple"ın ümumi smartfon tədarükündə artım 6,1% təşkil edəcək ki, bu da dünya üzrə orta göstərici olan 1,5%-dən xeyli yüksəkdir.
Bu barədə "MacRumors" məlumat verib.
Uğurun əsas səbəbi Çin bazarıdır. Oktyabr və noyabr aylarında "Apple" burada bazar payının 20%-dən çoxunu ələ keçirərək rəqiblərini xeyli qabaqlayıb. Bu, dördüncü rübdə ölkədə satış proqnozunu 9%-dən 17%-ə yüksəltməyə imkan verib və əvvəlcədən gözlənilən illik 1% azalma əvəzinə 3% artım proqnozlaşdırılıb. Oxşar artım ABŞ və Qərbi Avropada da müşahidə olunur.
"Apple"ın baş icraçı direktoru Tim Kuk daha əvvəl dekabr rübü üçün rekord gəlir gözləntisini açıqlamış, "iPhone" satışlarında isə tarixi maksimuma çatmaq ehtimalını vurğulamışdı. IDC-nin proqnozuna görə, "Apple"ın 2025-ci il üzrə ümumi gəliri 261 milyard dollar təşkil edəcək ki, bu da 7,2% artımı göstərir. Eyni zamanda, "iPhone Air" modeli gözləntiləri doğrultmayıb, lakin əsas "iPhone 17" və Pro modelləri müştərilər tərəfindən yüksək maraqla qarşılanıb.
2026-cı il üçün analitiklər iOS cihazlarının tədarükündə 4,2% azalma gözləyirlər.
