Cinayət işində adı keçənlərdən biri də Ramin İsayevin qardaşı Rafiq İsayevin evində xadimə işləyən Ulduzə İsmayılovadır. Rəsmi sənədlərlə xadiməyə məxsus olan “Manitou” markalı yükləyici “SOCAR-AQŞ” MMC-yə icarəyə verilib və aylıq 4600 manat icarə haqqı ödənilib. Ulduzə İsmayılovanın adına olan kart hesabına təxminən 5 il ərzində hər ay icarə haqqı köçürülüb. Bu isə ümumilikdə 280 min manata yaxın vəsait olub.
Ulduzə İsmayılova ifadəsində texnikanın ona məxsus olduğunu, özü icarəyə verdiyini və əldə etdiyi gəliri də şəxsi işlərinə xərclədiyini desə də, istintaq onun dediklərini inandırıcı hesab etməyib. Bu səbəbdən də həmin məsələ ilə bağlı Ramin İsayevə ittiham verilib və o da şahid qismində istintaqa cəlb olunub.
Şübhələrə əsas yaradan məqamlardan biri də bu olub ki, icarə pulunun köçürüldüyü və Ulduzə İsmayılovanın adına olan bank kartı onun özünün yox, işlədiyi evin sahibi Rafiq İsayevin sərəncamında olub. Bütün bunlar o qənaəti formalaşdırıb ki, Ulduzə İsmayılova formal mülkiyyətçi və icarədardır, onun adından istifadə olunur. Qeyd edək ki, Rafiq İsayev Xətai Rayon İcra Hakimiyyəti başçısının müavini idi. Ramin İsayev 2023-cü ilin iyulunda həbs olunub. Ona qarşı Cinayət Məcəlləsinin 179.4 (xüsusilə külli miqdarda mənimsəmə), 193-1.3.2 (cinayət yolu ilə əldə olunmuş külli miqdarda əmlakın leqallaşdırılması), 308.2 (vəzifə səlahiyyətlərindən sui-istifadə etmə, ağır nəticələrə səbəb olduqda), 313 (vəzifə saxtakarlığı) və başqa maddələri ilə ittiham irəli sürülüb. Prokuror iyulun 17-də bu ittihamlarla Ramin İsayevin 15 il azadlıqdan məhrum edilməsini istəyib. Ramin İsayev ona qarşı irəli sürülmüş ittihamları qəbul etmir.
Gununsesi.info
