Müşahidə olunur ki, bəziləri 11 illik buraxılış imtahanlarının mart ayında keçirilməsindən narazıdırlar. Bəs mart ayı düzgün seçimdirmi?
1xeber.media xəbər verir ki, Redaktor.az-a danışan təhsil eksperti Ramin Nurəliyev bildirdi ki, Dövlət İmtahan Mərkəzinin 11-ci sinifdə oxuyan şagirdlərin buraxılış imtahanlarını mart ayında keçirilməsinin əsaslı səbəbi var:
"Bildiyiniz kimi buraxılış imtahanlarının, eləcə blok imtahanlarının birinci və ikinci cəhdlərinin yoxlanılmasında insan faktorundan istifadə olunur. Bu da hardasa nəticələrin üç-dörd həftəyə çıxmasına gətirib çıxarır. DİM-in rəhbəri Məleykə xanım Abbaszadə çıxışında qeyd etmişdi ki, yaxın gələcəkdə imtahanlarımız elektron formada olacaq.
Hal-hazırda elektron formada Azərbaycanda imtahanlar tətbiq olunur. Bunu Elm və Təhsil Nazirliyinin, eləcə də DİM-in özünün də az namizədin iştirak etdiyi imtahanlarda görürük. Bu təcrübə Azərbaycanda varsa, yaxın gələcəkdə yəqin ki, DİM bu tətbiqi həyata keçirə biləcək. Əgər elektronlaşdırılmış formada həyata keçirilərsə, o zaman nəticələr birbaşa imtahandan sonra açıqlana biləcək. O təqdirdə imtahanların keçirilməsini mart ayından sonrakı aylara, yəni ən azından may ayına və yaxud aprel ayının sonlarına keçirmək imkanı olacaq. Amma hal-hazırkı vəziyyətdə mən hesab edirəm ki, mövcud vəziyyəti nəzərə alaraq martdan sonrakı aylarda keçirilməsi bir az çətin məsələdir.
Afrika, Hindistan var ki, bu ölkələrdə də buraxılış imtahanı martda olur. Mart ayında istər-istəməz proqram bitmir, proqramın bitməməsi də imtahanın keçirilməsindən sonra hardasa şagirdlərdə müəyyən qədər davamiyyətsizliyi ortaya çıxarır və yaxud da artıq məktəbdən soyumağı ortaya çıxarır. Bu iki problemin aradan qaldırılması üçün imtahanın formatı dəyişilməlidir ki, insan faktoru yoxlamasın, birbaşa elektron formada yoxlansın.
Bəzi ölkələrdə buraxılış imtahanı aprel ayındadır. Məsələn, Sinqapurda aprel ayında başlayır. Amma aprel ayında buraxılış imtahanı keçirən ölkələrin sayı o qədər də çox deyil. Əsasən may–iyun aylarında keçirilir. Qardaş Türkiyənin özündə də may ayından prosedur başlayır. Ümidvaram ki, elektron formada keçiriləndən sonra bizdə də tarixlərdə müəyyən dəyişiklik etmək mümkün olacaq".
