Azərbaycan xalqının qan yaddaşı olan Ana harayı abidə kompleksi Xocalı soyqırımına həsr olunmuş müqəddəs ziyarət məkanlarından biridir. Hər il soyqırımın ildönümündə yüz minlərlə insan abidəni ziyarət edərək faciə qurbanlarının xatirəsini ehtiramla yad edir. Bu il də artıq bir neçə gün öncədən ziyarətçilər tərəfindən abidənin ziyarət olunmasına başlanılıb.
1xeber.media xəbər verir ki,soyqırımın 34-cü ildönümü ilə əlaqədar abidənin yerləşdiyi, uzunluğu 1050 metr olan parkda genişmiqyaslı abadlıq və yenidənqurma işləri yekunlaşdırılıb. Görülən işlər çərçivəsində Xocalı prospekti boyunca abadlıq və təmizlik işləri aparılıb, yeni ağac və gül kolları əkilib. Park ərazisində 8 000 kvadratmetrdən artıq sahədə qazon örtüyü yenilənib, bütün park boyu xüsusi dizaynla 30 000-dən çox dekorativ güllər əkilib. Yararsız hala düşmüş hissələr aqlay daşlarla üzlənib, işıqlandırma sistemləri yoxlanılaraq mövcud çatışmazlıqlar aradan qaldırılıb. Günlüklər, skamyalar və parkı əhatə edən məhəccərlər təmir olunaraq rənglənib.
Bundan əlavə, Yusif Səfərov küçəsi istiqamətində də abadlıq işləri aparılıb, gül kolları əkilib və rəngarəng çiçəklərlə bəzədilmiş dekorativ dibçəklər yerləşdirilib. Xocalı prospekti boyunca binaların fasadlarına və işıq dirəklərinə Xocalı Soyqırımı haqqında məlumatlar, “Xocalıya ədalət!” plakat və banerləri vurulub.
Qeyd edək ki, Xocalı soyqırımını təcəssüm etdirən “Ana fəryadı” abidə kompleksi 1993-cü ildə ucaldılıb. Sonrakı illərdə həm abidə kompleksində, həm də park-xiyabanda əsaslı yenidənqurma işləri aparılıb. Bu çərçivədə abidənin postamenti hündürləşdirilib, “Ana fəryadı” heykəlinin mövzusu saxlanılmaqla forması yenilənib. Faciə zamanı qətlə yetirilmiş 613 şəhidin adları qranit lövhələr üzərinə həkk olunub. Park-xiyaban və abidə kompleksi xüsusi işıqlandırma sistemi ilə təchiz edilib, ərazidə günlüklər və oturacaqlar quraşdırılıb.
İnsanların həm abidəni ziyarət etməsi, həm də parkda istirahət etməsi nəzərə alınaraq, parkın səliqə-sahmanı ilboyu diqqətdə saxlanılır və mütəmadi olaraq nəzarətdə olur.
