1xeber.media xəbər verir ki, ABŞ Prezidenti Donald Tramp sosial media platforması TruthSocial-da İranın blokladığı Hörmüz boğazından tankerləri müşayiət edəcəyinə söz verib.
"Lazım gələrsə, ABŞ Hərbi Dəniz Qüvvələri ən qısa zamanda Hörmüz boğazından tankerləri müşayiət etməyə başlayacaq", - deyə Ağ Ev rəhbəri vurğulayıb.
O, həmçinin ABŞ Beynəlxalq İnkişaf Maliyyə Korporasiyasına (DFC) Fars körfəzi vasitəsilə həyata keçiriləcək bütün dəniz ticarəti, xüsusən də enerji ticarəti üçün siyasi risk sığortası və maliyyə təhlükəsizliyi zəmanətləri təmin etməyi əmr etdiyini açıqlayıb.
Vaşinqton bütün gəmilər üçün "çox münasib qiymətə" sığorta təmin edəcək. "Amerika Birləşmiş Ştatları bütün dünyada enerjinin sərbəst axınını təmin edəcək. Amerika Birləşmiş Ştatlarının iqtisadi və hərbi gücü Yer üzündə ən böyük gücdür", - deyə Tramp əlavə edib.
Daha əvvəl İslam İnqilabı Keşikçiləri Korpusu (İİKK) Hörmüz boğazından keçməyə çalışan hər hansı bir gəmini yandırmaqla hədələyib. Onlar lazım gələrsə, bölgədəki boru kəmərlərinə hücum etməyə və düşmənə mane olmaq üçün neft ixracını bloklamağa hazır olduqlarını vurğulayıblar.
