ABŞ Prezidenti Donald Trampın İranla bağlı atəşkəsi uzatdığını bəyan etməsindən sonra dünya bazarında qızılın qiyməti yenidən artıb.
1xeber.media xəbər verir ki, bu barədə informasiyanı Bloomberg və Reuters yayıb.
Məlumata görə, qızıl əvvəlki iki günlük enişdən sonra qismən bərpa olunub. Spot qızılın qiyməti 0,8-0,9 faiz artaraq unsiya üçün təxminən 4 755 dollar səviyyəsinə yüksəlib.
Bildirilir ki, əvvəlki ticarət sessiyasında qızılın qiyməti 2 faizdən çox geriləmişdi. Lakin Trampın İranla atəşkəsi uzatması və yeni sülh danışıqlarının təşkili üçün əlavə vaxt verməsi bazarda yenidən ehtiyatlı nikbinlik yaradıb.
Tramp açıqlamasında qeyd edib ki, İran yeni təklif təqdim edənədək və danışıqlar bu və ya digər şəkildə başa çatanadək ABŞ yeni zərbələrdən çəkinəcək. Bununla belə, regionda gərginlik tam aradan qalxmayıb.
Reuters yazır ki, atəşkəsin uzadılması fonunda neft ucuzlaşıb, dollar zəifləyib, bu isə qızılın bahalaşmasına dəstək verib.
Eyni zamanda, qeyri-müəyyənlik hələ də qalır. Müxtəlif mənbələrin məlumatına görə, Hörmüz boğazı ətrafında vəziyyət tam sabitləşməyib və tərəflərin danışıqlarda real irəliləyiş əldə edib-etməyəcəyi hələ bəlli deyil. Bu səbəbdən investorlar təhlükəsiz liman hesab olunan qızıla marağı qoruyurlar.
