Dünya bazarında 1 unsiya qızılın qiyməti 2942 ABŞ dollarına çataraq rekordunu yeniləyib. 2024-cü ildə qiymət 27 faiz artıb və 2025-ci ildə artımın davam edəcəyi proqnozlaşdırılır.
Ekspertlər hesab edir ki, qızılın qiyməti hələ zirvəyə çatmayıb və bu il qiymət daha 11 faiz artacaq.
Ümumiyyətlə, qızılın qiyməti son bir neçə ildə sürətli artımla müşayiət olunur. 2020-2024-cü illər arasında qiymət 1680-2075 dollar arasında dəyişsə də, 2024-cü ildə 2900 dollara qədər bahaşma olub. Artımın əsas səbəbi geosiyasi gərginliklər, ticarət müharibələri və mərkəzi bankların qızıl ehtiyatlarını artırması göstərilir.
2025-ci ildə qızılın qiymətinin 3000 dollar səviyyəsinə çatacağı uzaqda deyil. Amerikanın "Citi" və UBS kimi böyük maliyyə şirkətləri qızılın qiymətinə dair 2025-ci il üçün yenilənmiş proqnozlar yayıblar. "Citigroup" qızılın qiymətinin növbəti 3 ayda 3000 dollar səviyyəsinə yüksələcəyini gözləyir. Şirkət geopolitik qeyri-sabitliyin qiymətləri daha da artıra biləcəyini gözləyir. Şirkətin analitikləri Amerika dollarının güclənməsinin mərkəzi bankları qızıl ehtiyatlarını artırmağa təşviq edəcəyini proqnozlaşdırır.
UBS də 2025-ci il üçün 12 aylıq qızıl proqnozunu 3000 dollar olaraq yeniləyib. UBS-nin analitikləri qızılın qiymətinin artmasının qlobal faiz dərəcələrinin azaldılması və geopolitik gərginliklərlə əlaqəli olduğunu vurğulayıblar. Eyni zamanda, mərkəzi banklar və investorlar tərəfindən qızılın davamlı olaraq alınması da qiymət artımına təkan verir.
2025-ci ildə qızılın qiymətinin artması dünyanın müxtəlif regionlarında baş verən siyasi risklərin təsiri altında ola bilər. Siyasi gərginliklər, investorları qızıla yönləndirərək qiymət artımını gücləndirəcək.
Qızılın qiymətinin artması təkcə investorlar üçün deyil, həm də adi istehlakçılar üçün maraqlı bir hal alıb. Bahalaşma ilə bağlı xəbərlər insanlar tərəfindən həyəcanla qarşılanır. Bəzi insanlar qızılın qiymətinin daha da artacağını gözləyirlər və buna görə də qırıq zinət əşyalarını satmaqda tələsmirlər. Zinyət əşyalarının satışı ilə məşğul olan "House of Kan Estate Jewelers" şirkətinin prezidenti Tobina Kan qızılın qiymətinin 4000, hətta 6000 dollara çatacağını gözləyənlərin də olduğunu qeyd edib. Onun sözlərinə görə, bu artım bir neçə il ərzində baş verə bilər.
Bu gün Azərbaycanda qızılın qiymətləri dinamik şəkildə dəyişir və tələbat və təklifin təsiri altında hər dəqiqə yenilənir. Qızılın qiymətləri əsas ticarət mərkəzlərində (Tokio, London, Nyu-York birjaları) müəyyən edilir və Azərbaycanda qiymətlər manatla göstərilir.
13 fevral Azərbaycanda qızılın ən baha satıldığı gün kimi tarixə düşüb. Dünən 1 qram yüksək əyarlı qızıl 160 manatdan baha satılıb. Son 1 ildə Azərbaycanda qızılın ən yüksək qiyməti 2024-cü ilin bu günündə qeydə alınıb. 14 fevral 2024-cü ildə Azərbaycanda qızılın qramının qiyməti 109 manat olub.
Beləliklə, son 1 ildə Azərbaycanda qızılın qiyməti 47 faiz artıb. Bahalaşma dünya bazarında artım tempini yarıbayarı üstələyir.
