Ölkə daxilində kartla ödənişlərdə banklararası xidmət haqqı artıq yeni limitlər ilə hesablanır.
1xeber.media Xəzər Tv-yə istinadən xəbər verir ki, aptek və supermarketlərdə bunun yuxarı həddi 1,25 faiz, yanacaqdoldurma məntəqələrində 0,75 faiz, digər ümumi kateqoriyalarda isə maksimum 1,5 faizdir. Bəzi fəaliyyət sahələri üzrə isə konkret yuxarı hədd tətbiq olunmayıb.
Mövzu ilə bağlı danışan iqtisadçı Xalid Kərimli deyir ki, interçeync kartla ödəniş zamanı bir bankın digər banka ödədiyi xidmət haqqıdır. Məsələn, vətəndaş bir bankın kartı ilə başqa bankın POS-terminalında alış-veriş etdikdə, banklar arasında müəyyən komissiya ödənişi həyata keçirilir. Bu ödəniş isə banklar və ticarət obyektləri arasında formalaşır.
Ekspert deyir ki, burada əsas məqsəd nağdsız ödənişlərin həcmini artırmaqdır.
Ekspert bildirib ki, sahəni Mərkəzi Bank tənzimləyir. Mərkəzi Bank burada yuxarı hədd müəyyən etməklə POS-terminal şəbəkəsinin daha da genişləndirilməsinə şərait yaratmağa çalışır.
