İyunun 26-da polis əməkdaşlarının keçirdikləri tədbirlər nəticəsində, ailə üzvlərinə məlumat vermədən yaşadıqları ünvanı tərk edən və itkin düşmüş kimi axtarışda olan 11 nəfər tapılaraq aidiyyəti üzrə təhvil verilib.
Daxili İşlər Nazirliyindən 1xeber.media-ya verilən məlumata görə, fırıldaqçılığa görə axtarışda olan 4 nəfər saxlanılaraq istintaqa təqdim olunub.
Narkotik vasitələrin qanunsuz dövriyyəsinə qarşı mübarizə çərçivəsində ümumi çəkisi 34,2 kiloqrama yaxın narkotik maddə dövriyyədən çıxarılıb. Digər bir uğurlu əməliyyat zamanı isə yabanı halda bitmiş, ümumi çəkisi 12,1 ton olan 41 622 ədəd çətənə kolu aşkarlanaraq məhv edilib.
Bundan başqa, paytaxt və respublikanın ayrı-ayrı rayonlarında aparılan reydlər zamanı qanunsuz saxlanılan 2 avtomat, 2 qumbara, 9 tüfəng, 10 patron darağı və 486 ədəd müxtəlif çaplı patron aşkar edilərək götürülüb. Daxili İşlər Nazirliyi bu istiqamətdə qətiyyətli əməliyyat və profilaktik tədbirləri davam etdirir.
