Avropa İttifaqı Ermənistanın üzləşdiyi iqtisadi təzyiqlərin təsirini azaltmaq üçün yeni dəstək mexanizmlərini işə salır. Brüssel həm maliyyə yardımı ayırmağa, həm də Ermənistan məhsullarının Avropa bazarına çıxışını asanlaşdırmağa qərar verib.
1xeber.media Reuters-ə istinadən xəbər verir ki, Avropa Komissiyasının Prezidenti Ursula fon der Lyayen İrəvana səfəri zamanı bildirib ki, Avropa İttifaqı Ermənistana əlavə 18 milyon avro maliyyə yardımı göstərəcək. Bununla yanaşı, Ermənistan məhsullarının təxminən 80 faizinin Avropa bazarına daha əlverişli şərtlərlə çıxışı təmin ediləcək.
Brüsselin bu addımı son aylarda Moskvanın Ermənistan məhsullarına tətbiq etdiyi ticarət məhdudiyyətlərindən sonra atılıb. Məhdudiyyətlər əsasən kənd təsərrüfatı məhsulları, gül, balıq və alkoqollu içkilərin ixracına təsir edib.
Fon der Lyayen çıxışında Rusiyanın tətbiq etdiyi tədbirləri “iqtisadi təzyiq” kimi qiymətləndirərək bildirib ki, Avropa İttifaqı tərəfdaş ölkələr çətin vəziyyətlə üzləşdikdə onları dəstəksiz qoymayacaq.
Ekspertlər hesab edirlər ki, bu qərar yalnız iqtisadi deyil, həm də geosiyasi mesaj daşıyır. Son illər Ermənistanın Avropa ilə yaxınlaşmaq istiqamətində atdığı addımlar Moskva ilə münasibətlərdə gərginliyi artırıb. Yeni yardım paketi isə Brüsselin İrəvana siyasi və iqtisadi dəstəyini daha açıq şəkildə nümayiş etdirməsi kimi qiymətləndirilir.
