1xeber.media xəbər verir ki, Rusiya Müdafiə Nazirliyinin məlumatına görə, Rusiya Silahlı Qüvvələri Qara dənizdə Ukrayna Silahlı Qüvvələrinə (VSU) məxsus dörd quru yük gəmisini vurub.
Nazirliyin açıqlamasında bildirilib ki, gecə saatlarında Rusiya hərbçiləri Ukrayna ordusunun maraqları üçün istifadə olunan nəqliyyat infrastrukturuna zərbələri davam etdirib.
Məlumata görə, Rusiya qüvvələri Nikolayev limanına hücum edib və burada Ukrayna Silahlı Qüvvələri üçün yük daşıdığı bildirilən quru yük gəmisi vurulub.
Bundan əlavə, Qara dənizdə hərbi təyinatlı yüklərin daşınmasında istifadə edildiyi iddia olunan daha üç quru yük gəmisinin də zərər gördüyü bildirilib.
Bundan əvvəl Rusiya Müdafiə Nazirliyi Ukraynanın Rusiyaya kütləvi PUA hücumundan sonra açıqlama vermişdi. Nazirliyin məlumatına əsasən, avqustun 3-nə keçən gecə Rusiya hava hücumundan müdafiə qüvvələri 131 Ukrayna pilotsuz uçuş aparatını məhv edib.
Qeyd edək ki, hərbi əməliyyatlarla bağlı tərəflərin açıqladığı məlumatları müstəqil mənbələr vasitəsilə operativ şəkildə təsdiqləmək hər zaman mümkün olmur.
