“8 avqustda Vaşinqtonda Azərbaycan adına tarixi hadisə baş verdi. Bunu xüsusilə Azərbaycan adına qeyd edirəm. Çünki 8 avqust razılaşması, əslində, Azərbaycanın öz gücü hesabına regionda yeni reallıqlar yaratmasının nəticəsidir. Məlumdur ki, torpaqlarımız təxminən 30 il işğal altında qaldı. Həmin dövrdə həm işğalçı tərəf, həm də ona dəstək verən qüvvələr Azərbaycanı müxtəlif təzyiqlərlə mövcud vəziyyətlə barışmağa və ermənilərin nəzarətində olan ərazilərin onların xeyrinə rəsmiləşdirilməsinə razı salmağa çalışırdılar. Lakin biz heç vaxt bununla razılaşmayacağımızı açıq şəkildə bəyan etmişdik”.
Bu sözləri 1xeber.media-ya açıqlamasında deputat Arzuxan Əlizadə deyib.
Deputat bildirib ki, Azərbaycan xalqı, dövləti və siyasi iradəsi ilə bu mövqeyini sona qədər qoruyub və nəticədə 2020-ci ildə baş verən 44 günlük İkinci Qarabağ müharibəsində əldə olunan qələbə ilə yeni reallıqları özü formalaşdırıb:
“Beləliklə, Azərbaycanın yaratdığı, haqq və ədalətə, eləcə də beynəlxalq hüquqa əsaslanan reallıqların qəbul edilməsi məcburi oldu. Bu gün artıq həmin reallıqlar Ermənistan, onun tərəfdarları və digər böyük güclər tərəfindən də qəbul edilir. Avqustun 8-də Vaşinqtonda imzalanan sənədlər də bunu bir daha təsdiqləyir. Həmin sənədlər çərçivəsində Zəngəzur dəhlizi ilə bağlı məsələ faktiki olaraq həllini tapdı. Bununla yanaşı, sülh sazişinin paraflanması, 907-ci düzəlişin ləğvi, ATƏT-in Minsk Qrupunun fəaliyyətinə son qoyulması, eləcə də Azərbaycanla ABŞ arasında strateji müttəfiqliyi nəzərdə tutan razılaşmaların əldə olunması mühüm nəticələrdir”.
Arzuxan Əlizadə vurğulayıb ki, əldə olunan nəticələrin arxasında Azərbaycanın hərbi və siyasi gücü dayanır:
“Bütün bunlar Azərbaycanın gücü, ordumuzun qəhrəmanlığı, şəhidlərimizin qanı, qazilərimizin fədakarlığı və Ali Baş Komandan, Prezident İlham Əliyevin uzaqgörən siyasəti sayəsində mümkün olub. Bu gün diplomatik masada da həmin hərbi və siyasi uğurların davamını görürük. Azərbaycan Prezidentinin liderliyi ilə tarixi proseslərə şahidlik edirik.
8 avqust Azərbaycanın zəfər tarixinə daha bir mühüm səhifə kimi daxil oldu. Sülh müqaviləsinin imzalanması üçün Ermənistanın Konstitusiyasından Azərbaycana qarşı ərazi iddialarının çıxarılması və digər tələblərin də yerinə yetirilməsi vacibdir. Bunun da artıq uzaqda olmadığını düşünürəm. Regionda yeni reallıqlar formalaşır. Bu mərhələdə sülhün və sabitliyin əsas təminatçılarının Azərbaycan və qardaş Türkiyə olacağı qənaətindəyəm. Bu hadisəni tarixi zəfər kimi qiymətləndirmək tamamilə əsaslıdır”.
Aysel
