Türkiyədən Rusiyaya uçan və yolda “itkin düşdüyü” bildirilən rusiyalı turistləri daşıyan Pegasus Airlines təyyarəsinin harada olduğu məlum olub.
1xeber.media xəbər verir ki, RİA Novosti-nin məlumatına görə, təyyarə Rusiyanın Samara şəhərinə uğurla eniş edib.
Rusiya Turizm Sənayesi İttifaqından bildirilib ki, hazırda təyyarə əks istiqamətdə – Antalyaya uçuşa hazırlanır.
Məlumata görə, təyyarə Rusiyanın regionlarından birində hava gəmilərinin qəbulu və uçuşuna tətbiq edilən məhdudiyyətlər səbəbindən Qazaxıstan hava məkanında istiqamətini dəyişib və Trabzonda aralıq eniş edib.
Bununla yanaşı, Samara hava limanının onlayn tablosunda təyyarənin Türkiyənin Ərzurum şəhərinə eniş etdiyi göstərilib. Bu uyğunsuzluq sərnişinlərin yaxınları və turizm şirkəti arasında narahatlıq yaradıb.
Daha əvvəl, avqustun 19-na keçən gecə Türkiyədən Rusiyaya yola düşən rusiyalı turistlərin olduğu təyyarə ilə bağlı məlumatların itməsi barədə xəbər yayılmışdı.
Hazırda sərnişinlərin təhlükəsiz olduğu və təyyarənin Samara hava limanında olduğu bildirilir.
