Azərbaycan Respublikasının Prezidenti İlham Əliyevin Özbəkistana reallaşdırdığı dövlət səfəri hər iki ölkənin müasir tarixinə ən mühüm siyasi dönüş nöqtələrindən biri kimi düşdü.
1xeber.media xəbər verir ki,iki ölkə liderinin təkbətək və nümayəndə heyətlərinin iştirakı ilə keçirdiyi görüşlərdə imzalanan ən strateji sənəd – "Azərbaycan Respublikası ilə Özbəkistan Respublikası arasında Əbədi Dostluq və Müttəfiqlik Münasibətləri haqqında Müqavilə" oldu. Bu müqavilə sadəcə diplomatik protokol deyil, tərəflərin regional və qlobal təhlükəsizlik məsələlərində vahid cəbhədən çıxış edəcəyini göstərən hüquqi sənəddir.
Yeni geosiyasi konfiqurasiya: Bundan sonra nə dəyişəcək?
Səfər çərçivəsində Daşkənddə dövlət başçılarının rəhbərliyi altında Ali Dövlətlərarası Şuranın növbəti iclasının keçirilməsi idarəetmə mexanizmlərini ən yüksək pilləyə qaldırdı. İmzalanan müqavilənin xüsusi bəndlərinə əsasən, hər iki ölkə bir-birinin suverenliyinə, ərazi bütövlüyünə yönəlmiş hər hansı xarici təhdidə qarşı birgə siyasi-diplomatik məsləhətləşmələr aparmaq öhdəliyi götürür.
Bu addım Cənubi Qafqaz və Mərkəzi Asiya regionunun iki aparıcı gücünün Türk Dövlətləri Təşkilatı (TDT) daxilində şərikli fəaliyyətini tam formalaşdırır. Analitiklər hesab edir ki, rəsmi Bakı və Daşkənd xarici qüvvələrin regiona müdaxilə cəhdlərinə qarşı müştərək geosiyasi sipər qurur. Eyni zamanda Özbəkistan Prezidenti Şavkat Mirziyoyev vurğulayıb ki, Azərbaycanla münasibətlərin müttəfiqlik səviyyəsinə çatması hər iki ölkənin strateji muxtariyyətini daha da gücləndirəcək.
