Əlcəzairin şimal-şərqində baş verən genişmiqyaslı meşə yanğınları nəticəsində azı 12 nəfər ölüb, 54 nəfər yaralanıb. Yaralananlardan 6-nın vəziyyətinin ağır olduğu bildirilir.
1xeber.media xəbər verir ki, Əlcəzairin daxili işlər naziri Səid Sayud açıqlamasında ölümlərin Cijel, Bejaia və Tizi Uzu əyalətlərində qeydə alındığını bildirib.
Onun sözlərinə görə, Cijeldə 5, Bejaia əyalətində 4, Tizi Uzuda isə 3 nəfər həyatını itirib.
Sayud qeyd edib ki, yanğınlar səbəbindən onlarla ailə təhlükəli ərazilərdən təxliyə edilib. Ən çox zərər çəkən bölgələrdən biri olan Bejaiadakı xəstəxanada 54 nəfərin yanıq və tüstüdən zəhərlənmə səbəbilə müalicə aldığı açıqlanıb.
Mülki Müdafiə qüvvələrinin məlumatına görə, çərşənbə günü ölkə üzrə 154 meşə yanğını qeydə alınıb. Onlardan 36-sı Bejaia əyalətində baş verib və 18-i nəzarətə götürülüb.
Skikda, El Tarf, Buira, Tizi Uzu və Tebessa əyalətlərindəki yanğınların nəzarət altına alındığı bildirilsə də, Bejaia və Cijeldə mübarizə davam edir. Bejaiada 18, Cijelin isə 12 bələdiyyəsində yanğın ocaqlarının aktiv olduğu qeyd edilir.
